Telangana

రాష్ట్రంలో అధికారంలోకి వచ్చిన తర్వాత కాంగ్రెస్ (Congress) ప్రభుత్వం ప్రవేశపెట్టిన బడ్జెట్ మొదటిది కావడంతో.. ఆసక్తికరంగా మారింది. కాగా నేడు అసెంబ్లీలో డిప్యూటీ సీఎం, ఆర్థిక శాఖ మంత్రి భట్టి విక్రమార్క (Bhatti Vikramarka) ఓట్ ఆన్ అకౌంట్ బడ్జెట్‌ను ప్రవేశపెట్టారు. ఈ సందర్భంగా రైతు రుణమాఫీపై ప్రభుత్వం కీలక ప్రకటన చేసింది. ఎన్నికల ముందు ప్రజలకు హామీ ఇచ్చిన విధంగానే రైతు రుణ మాఫీ పథకాన్ని అమలు చేయబోతున్నామని ప్రకటించింది.

త్వరలో రూ.2 లక్షల రుణమాఫీపై కార్యాచరణ ప్రారంభం అవుతుందని తెలిపిన భట్టి.. గత ప్రభుత్వం హయాంలో రైతు బంధు పథకం వల్ల అసలు రైతుల కన్నా పెట్టుబడిదారులు, అనర్హులు ఎక్కవగా లాభం పొందారన్నారు. కొండలు, గుట్టలకు సైతం రైతుబంధు అందించారని పేర్కొన్నారు.. రైతు బంధు నిబంధనలను పున సమీక్షించి నిజమైన అర్హులను గుర్తించి ఎకరాకి ఏడాదికి రూ.15 వేలు అందజేస్తామని ఈ సందర్భంగా భట్టి తెలిపారు.

రాష్ట్రంలో పంటల భీమా పథకాన్ని.. ఫసల్ భీమా యోజన (Fasal Bhima Yojana) కార్యక్రమాన్ని ఆధారంగా చేసుకొని పటిష్టంగా అమలు చేయబోతున్నామన్నారు. కాగా ఈ బడ్జెట్‌లో కాంగ్రెస్ సర్కారు వ్యవసాయ రంగానికి రూ.19,746 కోట్లు కేటాయించిందని వివరించారు. కాగా, అసెంబ్లీ ఎన్నికల్లో భాగంగా కాంగ్రెస్ ఇచ్చిన ఆరు గ్యారెంటీ స్కీముల అమలుకు ప్రభుత్వం మధ్యంతరం బడ్జెట్‌లో రూ.53,196 కోట్లు కేటాయించింది.

అయితే హామీలకు సంంధించిన విధివిధాలను రూపొందించే పని ఇంకా కొనసాగుతోందని భట్టి తెలిపారు. ఆ పని పూర్తి అయిన వెంటనే అమలుకు అవసరమైన పూర్తి నిధులు కేటాయిస్తామని ప్రభుత్వం పేర్కొంది. ఇదిలా ఉండగా తెలంగాణ అసెంబ్లీ సమావేశాలు మూడవ రోజు ప్రారంభం అయ్యాయి. భట్టి విక్రమార్క 2024-2025 ఆర్థిక సంవత్సరానికి రూ.2,75,891 లక్షల కోట్ల ప్రతిపాదనలతో మధ్యంతర బడ్జెట్‌ను ప్రవేశపెట్టారు. రెవిన్యూ వ్యయం రూ.2,01,178 కోట్లు, మూల ధన వ్యయం రూ.29,669 కోట్లుగా బడ్జెట్‌లో పొందుపరిచారు.

తెలంగాణా (Telangana)లో ఉచిత బస్సు పథకం.. ఊహలకు అందని సమస్యలు సృష్టిస్తుందనే ఆరోపణలు రోజు రోజుకు పెరిగిపోతున్నాయి. దీనికి తోడు ఆర్టీసీ సిబ్బంది సహనానికి ఈ డ్యూటీలు పరీక్షలు పెడుతున్నాయి. ఇప్పటికే ఉచితంగా ప్రయాణిస్తున్న మహిళలు సిబ్బందిపై నోరుతో పాటు చేయి, కాలు పారేసుకొంటున్న సంఘటనలు ఎదురవుతున్నాయి.

ఈ క్రమంలో రెండు వారల క్రితం ఎల్బీ నగర్‌ (LB Nagar)లో చిల్లర ఇవ్వమని అడిగినందుకు.. కండక్టర్‌ను ఓ మహిళా ప్రయాణికురాలు కాలితో తన్నిన విషయం తెలిసిందే. తాజాగా శివరాంపల్లి వీకర్‌ సెక్షన్‌ కాలనీకి చెందిన ప్రసన్న అనే మహిళ.. శివరాంపల్లిలో బస్సు ఎక్కింది. ఈమె హైదర్‌గూడ (Hyderguda) కల్లు కంపౌండ్‌ దగ్గర దిగాల్సి ఉంది. కానీ అత్తాపూర్‌లో దిగింది. మళ్లీ వెనక్కి వెళ్లేందుకు రోడ్డుదాటి మెహదీపట్నం నుంచి ఉప్పల్‌ వెళ్తున్న 300 నంబర్‌ బస్సు ఎక్కింది.

దాదాపు 200 మీటర్ల దూరంలో ఉన్న బస్‌స్టాప్‌లో దిగేందుకు ప్రయత్నించగా కండక్టర్‌ ఆమెను ఎక్కడ దిగాలని అడిగారు. ఆపమన్న చోట బస్సు ఆపకుండా.. ప్రశ్నలు వేస్తున్నావా అంటూ ఆగ్రహానికి గురైన మహిళ.. చెప్పుతో కండక్టర్‌ చెంపలు చెల్లుమనిపించింది. మహిళలకు ఉచితంగా బస్సులు ఎందుకు నడుపుతున్నారంటూ బూతులు తిట్టింది. తోటి ప్రయాణికులు ఆమెను అడ్డుకొని బస్సును రాజేంద్రనగర్‌ పోలీస్‌ స్టేషన్‌కు తీసుకెళ్లారు.

కానీ పీఎస్‌ వద్ద బస్సు ఆగగానే ప్రసన్న అక్కడి నుంచి పరారైంది. కండక్టర్‌ ఫిర్యాదుతో రాజేంద్రనగర్‌ పోలీసులు ఆమెపై కేసు నమోదు చేసి దర్యాప్తు చేస్తున్నారు. మరోవైపు ఇటీవ‌ల వరుసగా ఆర్టీసీ సిబ్బందిపై దాడులు జరుగుతూనే ఉన్నాయి. దాడులపై ఆర్టీసీ ఎండీ సజ్జనార్ ఇప్పటికే వార్నింగ్ ఇచ్చారు. ఆర్టీసీ సిబ్బందిని ఇబ్బందిని పెడితే కఠిన చర్యలుంటాయని సీరియ‌స్‌గా వార్నింగ్ ఇచ్చారు. అయినా సిబ్బందిపై దాడులు ఆగ‌డం లేదు.

తెలంగాణ (Telangana) బడ్జెట్ సమావేశాలు ఆసక్తికరంగా సాగుతున్న సమయంలో సీఎం రేవంత్ రెడ్డి (CM Revanth Reddy) సంచలన నిర్ణయం తీసుకున్నారు. కాళేశ్వరం ప్రాజెక్టు విషయంలో మ్యాటర్ ఊహించిన దానికంటే ఎక్కువగా ఉండటం.. అందులో బీఆర్ఎస్ (BRS) నేతలు సైతం అవినీతి నిరూపించాలని సవాల్ విసిరిన నేపథ్యంలో.. ఈ నెల 13వ తేదీన ఎమ్మెల్యేలను కాళేశ్వరం ప్రాజెక్టు సందర్శనకు తీసుకువెళ్లాలనే ఆలోచనలో ప్రభుత్వం ఉన్నట్లు సమాచారం.

అయితే కాళేశ్వరం ప్రాజెక్టు ముఖ్య సూత్ర దారి అయిన కేసీఆర్ (KCR)ను ఆహ్వానించాలని ప్రభుత్వం నిర్ణయించినట్లు తెలుస్తోంది. ఇందులో భాగంగా ఈ బాధ్యతను ఇరిగేషన్ మినిస్టర్ ఉత్తమ్ కుమార్ రెడ్డికి.. ముఖ్యమంత్రి రేవంత్ రెడ్డి అప్పగించినట్లు తెలిసింది. ప్రస్తుతం అసెంబ్లీ సమావేశాలు జరగుతున్నాయి. షెడ్యూల్ ప్రకారం అసెంబ్లీ సమావేశాలు ఈనెల 13వ తేదీ వరకు జరగాల్సి ఉండగా ఒక రోజు ముందు 12వ తేదీనే ముగించే ఆలోచనలో ప్రభుత్వం ఉన్నట్లు సమాచారం.

అయితే మేడిగడ్డ సందర్శనకు సమావేశాలు ముగిసిన మరుసటి రోజే తీసుకువెళ్లాలని ప్రభుత్వం నిర్ణయించినట్లు తెలుస్తోంది. మరోవైపు కృష్ణా జలాల అంశంపై నల్గొండ జిల్లాలో 13వ తేదీన కేసీఆర్ భారీ బహిరంగ సభ నిర్వహించబోతున్నారు. ఇదే రోజు ప్రభుత్వం కాళేశ్వరం సందర్శనకు అఖిలపక్షాన్ని తీసుకువెళ్లాలనే ఆలోచనతో పాటు ఈ సందర్శనకు కేసీఆర్ ను సైతం ఆహ్వానించాలనే ప్రభుత్వ నిర్ణయం రాష్ట్ర రాజకీయాల్లో ఆసక్తికరంగా మారింది.

ప్రస్తుతం కాంగ్రెస్, బీఆర్ఎస్ మధ్య వాటర్ వార్ తారాస్థాయికి చేరుకుంటోంది. బడ్జెట్ సమావేశాలు కొనసాగుతున్న వేళ కాళేశ్వరం ప్రాజెక్టు అంశంలో కాంగ్రెస్ పార్టీ కేసీఆర్‌ను రౌండప్ చేసే ప్రయత్నం చేస్తుంటే, కృష్ణాజలాల విషయంలో బీఆర్ఎస్ అధికార పక్షాన్ని కార్నర్ చేసేందుకు ప్రణాళికలు రచిస్తున్నారు. అదీగాక కాళేశ్వరం పాపం అంతా కేసీఆర్ దేనని పదే పదే నొక్కి చెబుతున్న రేవంత్ రెడ్డి నిన్న అసెంబ్లీ వేదికగా కృష్ణాజలాల్లో తెలంగాణకు అన్యాయం జరగడానికి కేసీఆర్ కారణం అని ఆరోపించారు.

మరోవైపు అనూహ్యంగా అధికార పక్షం కాళేశ్వరం సందర్శన ప్లానింగ్ వెనుక రేవంత్ వ్యూహం ఉందని అనుకొంటున్నారు. కానీ మేడిగడ్డ, అన్నారం బ్యారేజీల విషయంలో ఇప్పటి వరకు స్పందించని కేసీఆర్ ఇప్పుడు ప్రభుత్వం ఆహ్వానిస్తే సందర్శనకు వెళ్తారా లేదా అనేది పొలిటికల్ సర్కిల్లో చర్చకు దారితీస్తోంది.