Telangana

మాజీ మంత్రి హరీశ్ రావు (Harish Rao) కీలక వ్యాఖ్యలు చేశారు. కేసీఆర్ (KCR )కక్ష సాధింపు చర్యలకు పూనుకుని ఉంటే కాంగ్రెస్ నేతలు ఇప్పుడు జైళ్లలో ఉండేవారని అన్నారు. ఆయనకు పనితనం తప్ప పగతనం తెలియదన్నారు. బీఆర్ఎస్ ఓటమి కేవలం తాత్కాలికం మాత్రమేనని తెలిపారు. భవిష్యత్ బీఆర్ఎస్‌దేనన్నారు.

తెలంగాణ భవన్‌లో ఖమ్మం పార్లమెంట్ నియోజకవర్గ సన్నాహాక సమావేశాన్ని నిర్వహించారు. ఈ సందర్బంగా హరీశ్ రావు మాట్లాడుతూ…. ఖమ్మం కాంగ్రెస్‌లో మూడు వర్గాలు ఉన్నాయని తెలిపారు. అందులో ఒకటి వైస్సార్ కాంగ్రెస్ అని, మరొకటీ టీడీపీ కాంగ్రెస్, ఇంకొకటి ఒరిజినల్ కాంగ్రెస్ అని పేర్కొన్నారు. కాంగ్రెస్ పాలనలో బీఆర్ఎస్ కార్యకర్తలపై కక్ష సాధింపు చర్యలు పెరిగాయన్నారు.

తెలంగాణకు బీఆర్ఎస్ అవసరం లేదంటున్నారని బీజేపీ నేత కిషన్ రెడ్డి అంటున్నారని మండిపడ్డారు. బీఆర్ఎస్ లేక పొతే తాము తెలంగాణకు అన్యాయం చేయోచ్చని అనుకుంటున్నారని ధ్వజమెత్తారు. ఆయన ఆశలు అడియాశలే అవుతాయన్నారు. పార్లమెంట్‌లో ఎక్కువ ప్రశ్నలు అడిగింది బీఆర్ఎస్ ఎంపీ నామా నాగేశ్వర్ రావు అని గుర్తు చేశారు. బీఆర్ఎస్‌ను గెలిపిస్తేనే ఖమ్మం జిల్లాకు మేలు జరుగుతుందన్నారు.

బీఆర్ఎస్ కార్యకర్తల గుండెలు రగులుతున్నాయని, పార్లమెంట్ ఎన్నికల్లో గెలవాలనే కసితో పని చేస్తారని చెప్పారు. నాలుగు రోజులు ఓపిక పట్టండని, మళ్లీ బీఆర్ఎస్‌కు బంగారు పల్లెంలో పెట్టి అధికారం ఇస్తారని వెల్లడించారు. కాంగ్రెస్ అన్నింటికీ వంద రోజుల డెడ్ లైన్ పెడుతోందని విమర్శలు గుప్పించారు.
ఆ వంద రోజుల తర్వాత కాంగ్రెస్‌పై ప్రజలే చీటింగ్ కేసులు పెడతారన్నారు. తాము హైదరాబాద్‌లో ఎక్కువ ఉండబోమని చెప్పారు. మీ కోసం.. మీ దగ్గరకే వస్తామని స్పష్టం చేశారు.

మరిన్ని తెలంగాణ వార్తలు మరియు తెలుగు న్యూస్ కోసమై ఇవి చదవండి…!

త్వరలోనే ఇందిరమ్మ కమిటీలను నియమించి, సంక్షేమ పథకాల (Welfare Schemes)ను ప్రజలకు చేరుస్తామని సీఎం రేవంత్ రెడ్డి (Revanth Reddy) తెలిపారు. నిజమైన లబ్ధిదారులకు సంక్షేమ పథకాలు అందేలా చూడాలని జిల్లా ఇంఛార్జ్ లు, ఎమ్మెల్యేలకు సీఎం సూచించారు. నియోజకవర్గంలో నిజాయితీ, నిబద్దత ఉన్న అధికారులను నియమించుకోవాలని అన్నారు.

హైదరాబాద్​లోని మర్రి చెన్నారెడ్డి మానవ వనరుల అభివృద్ధి కేంద్రంలో ఖమ్మం, వరంగల్​, కరీంనగర్​, నల్లగొండ, రంగారెడ్డి జిల్లాల ఇంఛార్జ్​ మంత్రులు, ఎమ్మెల్యేలతో రేవంత్ రెడ్డి సమావేశం అయ్యారు. ఈ సమావేశంలో రేవంత్ రెడ్డి మాట్లాడుతూ…. ప్రతి నియోజకవర్గానికి రూ.10 కోట్ల స్పెషల్​ డెవలప్​మెంట్​ నిధులు కేటాయిస్తున్నామని రేవంత్ రెడ్డి ప్రకటించారు.

ఈ నిధుల బాధ్యతను ఉమ్మడి జిల్లాల ఇంఛార్జ్​ మంత్రులకు అప్పగిస్తున్నామని అన్నారు. ప్రభుత్వానికి చెడ్డపేరు తెచ్చే పనులు చేయొద్దని ఐదు జిల్లాల ఇంఛార్జ్​లకు, ఎమ్మెల్యేలకు, పార్టీ శ్రేణులకు సీఎం రేవంత్​ రెడ్డి సూచించారు. ప్రభుత్వ శాఖల్లో అవినీతి అధికారులను ప్రోత్సహించేది లేదని స్పష్టం చేశారు. పోలీసుల బదిలీల్లో పైరవీలకు తావు లేదని వెల్లడించారు.

పార్లమెంట్ ఎన్నికల్లో విజయమే లక్ష్యంగా పని చేయాలని సూచించారు. 12 స్థానాలకు తగ్గకుండా గెలిపించుకోవాలని సూచించారు. రాష్ట్రంలో పార్టీ, ప్రభుత్వాన్ని సమన్వయం చేసుకుంటూ ప్రజల్లోకి వెళ్లాలని పార్టీ శ్రేణులకు పిలుపునిచ్చారు. ఇంఛార్జ్​ మంత్రులతో సమన్వయం చేసుకుంటూ నియోజకవర్గాలను అభివృద్ధి చేసుకోవాలని, సమస్యలను పరిష్కరించుకోవాలని పేర్కొన్నారు.

ఇది ఇలా వుంటే గోద్రెజ్​ అగ్రోవెట్​ ఎండీ బలరాంసింగ్​ నేతృత్వంలోని బృందం సచివాలయంలో సీఎంను కలిసింది. తెలంగాణలో స్థిరాస్తి వ్యాపారం, ఫర్నీచర్​ రంగాల్లో పెట్టుబడులు పెట్టాలని ఈ సందర్బంగా ఆ బృందాన్ని సీఎం రేవంత్​ రెడ్డి కోరారు. ఈ భేటీలో ఐటీ, పరిశ్రమల శాఖ మంత్రి శ్రీధర్​ బాబు, సీఎస్​ శాంతికుమారి పాల్గొన్నారు.

బీఆర్ఎస్ ఎమ్మెల్యే (MLA) చామకూర మల్లారెడ్డి (Malla Reddy) గురించి ప్రత్యేకంగా పరిచయం చేయాల్సిన పని లేదు. ఆయన ఎక్కడ ఉన్న తన చేష్టలు, డైలాగ్స్‌తో సందడి చేస్తారు. తన జోష్‌తో చుట్టు పక్కల ఉన్న వాళ్లలో ఉత్సహాన్ని నింపుతారు. ఇప్పటికీ ఆయన డైలాగులూ సోషల్ మీడియాలో ట్రెండింగ్ లో ఉన్నాయి.

తాజాగా ఎమ్మెల్యే మల్లారెడ్డి గోవా ట్రిప్ వెళ్లారు. అక్కడ బీచ్‌లో కాసేపు రిలాక్స్ అయ్యారు. వాటర్ రైడ్ చేస్తూ ఫుల్ ఎంజాయ్ చేశారు. తానే స్వయంగా బోటు నడిపుతూ సరదాగా గడిపారు. కండ్లకు కూలింగ్ గ్లాసెస్ పెట్టుకుని బోట్ నడుపుతూ దుమ్ము రేపారు. ఆ తర్వాత పారా గ్లైడెంగ్ కూడా చేశారు.

అక్కడున్న తెలుగు టూరిస్టులతో జై మల్లన్న అనిపించుకున్నారు. తాజాగా తన గోవా టూర్ కు సంబంధించిన వీడియోలను సోషల్ మీడియాలో మల్లా రెడ్డి షేర్ చేశారు. ఈ వీడియోలు ఇప్పుడు వైరల్ అవుతున్నాయి. మల్లారెడ్డి జోష్ ను చూసి నెటిజన్లు వీడియోకు లైక్ లు కొడుతున్నారు.

ఆయనలో ఉత్సాహాన్ని చూసి తమ దైన శైలిలో నెటిజన్లు కామెంట్స్ చేస్తున్నారు. మల్లారెడ్డి ఎక్కడా తగ్గడం లేదని అంటున్నారు. ప్రభుత్వంలో ఉన్నా.. ప్రతిపక్షంలో ఉన్నా ఆయన స్టైలే వేరు అంటూ కామెంట్స్ పెడుతున్నారు. మల్లన్న వీడియోలు చూసి చాలా ఎంటర్ టైన్మెంట్ అవుతోందని అంటున్నారు.

Mla Chamakura mallareddy is enjoying in goa

కాంగ్రెస్ (Congress) హామీ ఇచ్చినట్లుగా కొత్త పింఛన్లు, 200 యూనిట్ల ఉచిత విద్యుత్ ఊసే లేదని బీఆర్ఎస్ ఎమ్మెల్సీ (MLC) కల్వకుంట్ల కవిత (Kavitha) అన్నారు. ప్రభుత్వానికి వంద రోజుల సమయం ఇస్తామని వెల్లడించారు. కానీ హామీలను నెరవేర్చకపోతే ప్రజల తరుపున కొట్లాడుతామని హెచ్చరించారు. పార్లమెంట్‌లో తెలంగాణ ప్రజల కోసం పొరాడేది కేవలం బీఆర్ఎస్ మాత్రమేనన్నారు.

మహబూబ్ నగర్ జిల్లా కేంద్రంలో ఎమ్మెల్సీ కవిత మీడియాతో మాట్లాడారు. తనకు మహబూబ్ నగర్ జిల్లాతో ఓ ప్రత్యేకమైన అనుబంధం ఉందని చెప్పారు. కేసీఆర్ ఇక్కడి నుంచి పోటీ చేసినప్పటి నుంచి తనకు అనుబంధం ఉందన్నారు. ఇక్కడి ఎంపీగా ఉండి కేసీఆర్ తెలంగాణను సాధించారని తెలిపారు. ఆ విషయం తనకు చాలా గర్వ కారణమన్నారు.

తనకు నిజామాబాద్ ఎలాగో, మహబూబ్ నగర్ కూడా అలాగేనని స్పష్టం చేశారు. జిల్లాలో వలసలను ఎలా ఆపాలో తాము పూర్తి స్థాయిలో అధ్యయనం చేశామని పేర్కొన్నారు. ఇక్కడ 35 లక్షల ఎకరాల సాగు యోగ్యమైన భూమి ఉందన్నారు. సాగునీరు లేకపోవడంతోనే ప్రజలు వలస వెళ్లిపోతున్నారని ఆవేదన వ్యక్తం చేశారు. కేసీఆర్ సీఎం పదవి చేపట్టిన తర్వాత 11 లక్షల ఎకరాలను సాగులోకి తీసుకు వచ్చారన్నారు.

పాలమూరు రంగారెడ్డి ఎత్తిపోతల పథకంలో 90 శాతం పనులు పూర్తయ్యాయని వివరించారు. ఇంకా 10 శాతం పనులు పూర్తి కావాల్సి ఉందన్నారు. ఇదే జిల్లా నుంచి రేవంత్ రెడ్డి సీఎంగా ఉన్నారని అన్నారు. కానీ ఈ ప్రాజెక్టు టెండర్లను రద్దు చేస్తామంటున్నారని మండిపడ్డారు. టెండర్లను ఎందుకు రద్దు చేస్తారో చెప్పాలని డిమాండ్ చేశారు. దీనిపై అసెంబ్లీలో పవర్ పాయింట్ ప్రజెంటేషన్ ఇవ్వాలన్నారు.

చివరి అనుమతుల కోసం సీఎం రేవంత్ ప్రయత్నించాలని సూచించారు. ప్రధానితో కేసీఆర్ కు సత్సంబంధాలు లేకపోవడం వల్లే కేంద్రం సహకరించ లేదని రేవంత్ రెడ్డి చెబుతున్నారని, ఇప్పుడు ఆయన కేంద్రంతో సత్సంబంధాలు పెట్టుకోండన్నారు. లేదా కేంద్రంతో పోట్లాడండన్నారు. కానీ ప్రజల పనులు పూర్తి చేయండని సూచనలు చేశారు. ఎన్నికల్లో ఆశించిన స్థాయిలో ఫలితం రాలేదని, కానీ మనం ఉద్యమ కారులమన్నారు. ఏ తప్పు ఎక్కడ జరిగిందో తెలుసుకోవాలి పోరాడాలి పార్టీ శ్రేణులకు పిలుపునిచ్చారు.

ప్రజావాణి (Prajavani) కార్యక్రమం ద్వారా తన సమస్యను ప్రభుత్వం దృష్టికి తీసుకు వెళ్లిన ఓ మహిళకు ఉద్యోగం లభించింది. విధి నిర్వహణలో ఉండగా రోడ్డు ప్రమాదంలో ప్రాణాలు కోల్పోయిన కానిస్టేబుల్ భార్యకు ప్రభుత్వం ఉద్యోగం ఇచ్చింది. రాచకొండ కమిషనరేట్‌లో ఆ మహిళకు ఉద్యోగం రాగా తాజాగా ఆమెకు సీపీ సుధీర్ బాబు (CP Sudheer Babu) అపాయింట్ మెంట్ లెటర్ అందజేశారు.

రాచకొండ పోలీసు కమిషనరేట్ పరిధిలోని అంబర్ పేట్ పోలీసు హెడ్ క్వార్టర్స్‌లో సొంగా శేఖర్ కానిస్టేబుల్ గా పని చేసేవారు. 2021 సెప్టెంబర్ 30న విధి నిర్వహణలో ఉండగా రోడ్డు ప్రమాదంలో ఆయన ప్రాణాలు కోల్పోయారు. దీంతో ఈ విషయాన్ని ఆయన భార్య సత్యలత అప్పటి బీఆర్ఎస్ ప్రభుత్వ దృష్టికి తీసుకు వెళ్లారు. తమకు సహాయం చేయాలి ప్రభుత్వాన్ని కోరారు.

ఆమె ఏపీకి చెందిన మహిళ కావడంతో స్థానికత నిబంధన అడ్డు వచ్చింది. దీంతో ఆమెకు ఉద్యోగం ఇచ్చేందుకు అప్పటి బీఆర్ఎస్ ప్రభుత్వం నిరాకరించింది. చూస్తుండగానే రెండేండ్లు గడిచి పోయింది. ఇటీవల రాష్ట్రంలో నూతనంగా ఏర్పడిన కాంగ్రెస్ ప్రభుత్వం ప్రజావాణి కార్యక్రమాన్ని చేపట్టింది. ఈ కార్యక్రమంలో సీఎం రేవంత్ రెడ్డిని కలిశారు.

తన కుటుుంబ పరిస్థితిని సీఎం రేవంత్ రెడ్డికి ఆమె వివరించారు. దీంతో మానవతా దృక్పథంతో నిబంధనలు సడలించాలని, ఆమెకు ఉద్యోగం ఇవ్వాలని రాష్ర్ట డీజీపీ, రాచకొండ సీపీలను రేవంత్ రెడ్డి ఆదేశించారు. ఈ నేపథ్యంలో రాచకొండ కమిషనరేట్ కార్యాలయంలో ఆమెకు జూనియర్ అసిస్టెంట్ ఉద్యోగాన్ని ఇవ్వాలని రాచకొండ సీపీకి డీజీపీ ఉత్తర్వులు జారీ చేశారు. తాజాగా ఆమెకు సీపీ అపాయింట్ మెంట్ లెటర్ ఇచ్చారు.