Andhra Pradesh

అధికార వైసీపీ(YCP)లో సీట్ల మార్పులు, చేర్పులు జరుగుతోన్న వేళ ఏపీ రాజకీయాలు ఆసక్తికరంగా మారాయి. ఏ నాయకుడు ఎప్పుడు రాజీనామా ప్రకటన చేస్తాడో తెలియని పరిస్థితులు నెలకొన్నాయి. తాజాగా, కృష్ణాజిల్లా(Krishna District) పెనమలూరు ఎమ్మెల్యే, మాజీ మంత్రి కొలుసు పార్థసారథి(Partha Saradhi) పార్టీకి గుడ్‌బై చెప్పేందుకు సిద్ధమైనట్లు తెలుస్తోంది.

ఆయనతో వైసీపీ నేతలు చర్చలు జరిపినా ఆ ఎపిసోడ్ ఇంకా కొలిక్కిరాలేదు.. మరోసారి పార్థసారథితో వైసీపీ రీజనల్ కో-ఆర్డినేటర్ అయోధ్య రామిరెడ్డి 30నిమిషాల పాటు చర్చలు జరిపారు. మంగళవారం పార్థసారథి సీఎం వైఎస్ జగన్‌ను కలిసినా ఆయనలో అసంతృప్తి తగ్గినట్లు కనిపించడంలేదు. వచ్చే ప్రభుత్వం కేబినెట్‌లో బెర్త్‌పై హామీ కోసం పార్థసారథి పట్టుబడుతున్నట్లు సమాచారం.

సారథితో జరిపిన చర్చల సారాంశాన్ని రామిరెడ్డి సీఎం దృష్టికి తీసుకెళ్లినట్లు తెలుస్తోంది. మరి, దీనిపై పార్టీ అధిష్టానం ఎలా స్పందిస్తోంది చూడాలి. మరోవైపు పార్థసారథి టీడీపీలో చేరతారనే ప్రచారం జోరందుకుంది. టీడీపీ నేతలు ఆయన ఇంటికి వెళ్లి చర్చలు జరిపడమే అందుకు కారణం. పార్థసారథి ఇంటికి టీడీపీ ఎమ్మెల్యే వెలగపూడి రామకృష్ణ, మైలవరం టీడీపీ నేత బొమ్మసాని సుబ్బారావు వెళ్లి భేటీ అయ్యారు.

ఈ నేపథ్యంలో వైసీపీ ఎమ్మెల్యే వెల్లంపల్లి శ్రీనివాస్, మొండితోక అరుణ్‌కుమార్ కూడా అక్కడికి వెళ్లారు. అయితే, ఇప్పటి వరకు మూడు సార్లు ఎమ్మెల్యేగా గెలిచిన ఆయన ఉమ్మడి ఏపీలో ఐదేళ్ల పాటు కాంగ్రెస్ పార్టీ ప్రభుత్వంలో మంత్రిగా పనిచేశారు. కేబినెట్ విస్తరణలో పదవి ఆశించి భంగపడిన ఆయన అసంతృప్తితో ఉన్నారు. తాజా పరిణామాలు పార్థసారథి పార్టీ మార్పు ఖాయంగానే కనిపిస్తోంది.

పొలిటికల్ రీ ఎంట్రీపై మాజీ ఎంపీ లగడపాటి రాజగోపాల్(Lagadapati Rajagopal) క్లారిటీ ఇచ్చారు. సోమవారం రాజమండ్రి(Rajahmundry)లో ఆయన పర్యటించారు. ఈ సందర్భంగా ఆయన ఉండవల్లి అరుణ్ కుమార్, హర్షకుమార్‌లతో భేటీ అయ్యారు. త్వరలో లోక్‌సభ, ఏపీ అసెంబ్లీకి ఎన్నికలు జరగనున్న నేపథ్యంలో వీరి భేటీ ప్రధాన్యత సంతరించుకుంది.

తెలంగాణలో కాంగ్రెస్ పార్టీ అధికారంలోకి రావడం సంతోషంగా ఉందన్న ఆయన మళ్లీ రాజకీయాల్లోకి వచ్చే ఆలోచన తనకు లేదని స్పష్టం చేశారు. అయితే, ఏపీలో అసెంబ్లీ ఎన్నికలు దగ్గర పడుతుండడంతో అక్కడ రాజకీయ వేడి పెరిగింది. ఈ నేపథ్యంలో అధికార పార్టీ అనేక మార్పులు చేర్పులు చేస్తోంది.

అదేవిధంగా కాంగ్రెస్ పార్టీలో వైఎస్ షర్మిల చేరిన తర్వాత సీనియర్ రాజకీయ నేతలతో పాటు సిట్టింగ్ ఎమ్మెల్యేలు, మాజీ ప్రజాప్రతినిధులు కాంగ్రెస్ పార్టీలో చేరతారనే ప్రచారం సాగుతోంది. ఈ నేపథ్యంలో లగడపాటి రాజగోపాల్ రాజమండ్రి పర్యటన రాజకీయ వర్గాల్లో ప్రాధాన్యత సంతరించుకుంది.

రాష్ట్ర విభజనతోనే నా రాజకీయ జీవితం ముగిసిందన్నారు. రాజకీయాలకు దూరంగా ఉన్నాను. ఎన్నికల్లో పోటీ చేయనని ఆయన స్పష్టం చేశారు. రాష్ట్రంలో తమిళనాడు తరహాలో జాతీయ పార్టీలు, ప్రాంతీయ పార్టీల మధ్య పోటీ పోయిందని లగడపాటి అన్నారు. రాబోయే ఎన్నికల్లో కేవలం ప్రాంతీయ పార్టీల మధ్యనే పోటీ ఉంటుందని చెప్పారు.

రాష్ట్ర విభజనతోనే నా రాజకీయ జీవితం ముగిసిందని ఆయన పేర్కొన్నారు. మా భేటీలో ఎలాంటి రాజకీయ పరిణామాలకు సంబంధించిన అంశాలు లేవన్నారు. రాజమండ్రి వస్తే ఉండవల్లి అరుణ్ కుమార్, హర్ష కుమార్‌లను కలవడం సాధారణం అని తెలిపారు.

వైసీపీ ప్రభుత్వం(YCP Government)పై టీడీపీ జాతీయ అధ్యక్షుడు నారా లోకేశ్(Nara Lokesh) సంచలన వ్యాఖ్యలు చేశారు. చిత్తూరు జిల్లా(Chittoor District)లో స్కూలుకు వెళ్లే బాలికను వైసీపీ ముఠా గంజాయికి బానిస‌ని చేసిందని, గంజాయికి బానిసైన బాలికపై లైంగిక దాడి చేశారని ఆరోపించారు.

విద్యార్థులు మ‌ద్యం మ‌త్తులో బ‌డికొస్తున్నారన్నారు. నియంత్రించాల్సిన స‌ర్కారే ప్రోత్స‌హిస్తోంద‌ని, రాష్ట్రంలో జరుగుతున్న సంఘ‌ట‌న‌లు నిరూపిస్తున్నాయని నారా లోకేశ్ ఆందోళన వ్యక్తం చేశారు. ఆ బాలికను డీ అడిక్ష‌న్ సెంట‌ర్‌కి పంపామని నారా లోకేశ్ తెలిపారు. వైసీపీ పాల‌న‌లో బ‌డిలో, గుడిలోకి గంజాయి వ‌చ్చేసిందన్నారు.

సీఎం జ‌గ‌న్‌ ఇంటి ఎదురుగా గంజాయికి బానిసైన పిల్లాడి త‌ల్లి ఆవేద‌న వ్య‌క్తంచేస్తే, ఆమెని పోలీసులు బెదిరించి నోరు మూయించారని లోకేశ్ తెలిపారు. సీఎం ఇంటికి స‌మీపంలో మాదకద్రవ్యాల మ‌త్తులో సామూహిక లైంగికదాడి జరిగితే నేటికీ నిందితులను పట్టుకోలేదన్నారు. అదేవిధంగా సీఎం ఇంటికి ద‌గ్గ‌రే మ‌ద్యం మ‌త్తులో ఒక ఉన్మాది అంధురాలిని హ‌త్య‌చేస్తే చ‌ర్య‌ల్లేవంటూ మండిపడ్డారు.

రాష్ట్రంలో పెరుగుతున్న మాదకద్రవ్యాలు, మద్యం నిషేధంపై ప్రభుత్వానికి అనేక లేఖలు రాశానని లోకేశ్ గుర్తుచేశారు. అయితే, వైసీపీ సర్కార్ టీడీపీ కార్యాలయాలపై దాడులు, తనపై మాటల దాడులు చేసిందే కానీ కనీస చర్యలు తీసుకోలేదని విమర్శించారు. పిల్ల‌లు, యువ‌త బంగారు భ‌విష్య‌త్తు నాశ‌నం కావ‌డం చూసి ఆందోళ‌న‌తో ప్ర‌ధానికీ లేఖ రాసినట్లు లోకేశ్ చెప్పుకొచ్చారు.

చంద్ర‌గిరిలో 9వ త‌ర‌గ‌తి అమ్మాయి గంజాయికి బానిసైందని, చోడ‌వ‌రంలో ఏడ‌వ‌ త‌ర‌గ‌తి విద్యార్థులు స్కూలులో మ‌ద్యం తాగుతుండ‌గా, వీడియో తీసిన వ్య‌క్తిపై దాడికి పాల్ప‌డ్డారని లోకేశ్ అన్నారు. పిల్ల‌లు, యువ‌త బంగారు భ‌విష్యత్తు నాశ‌నమవడానికి కార‌ణ‌మైన దండుపాళ్యం వైసీపీ స‌ర్కారుకి ఎన్నిక‌ల్లో బుద్ధి చెప్పాలన్నారు. టీడీపీ-జ‌న‌సేన ప్ర‌భుత్వం ఏర్పడ్డాక గంజాయి, మాదకద్రవ్యాలు, ప్రమాదకర మద్యంపై ఉక్కుపాదం మోపుతామని తెలిపారు.

అంగన్‌వాడీలపై(Anganwadi Strike) వైసీపీ ప్రభుత్వం ఎస్మా ప్రయోగించడంపై సీపీఐ నేత నారాయణ (CPI Leader Narayana) తీవ్రస్థాయిలో ధ్వజమెత్తారు. జోరు వానలోనూ సోమవారం అంగన్‌వాడీలు నిరసన కొనసాగించారు. వారికి నారాయణ మద్దతు తెలిపారు.

అనంతరం ఆయన మాట్లాడుతూ కీలక వ్యాఖ్యలు చేశారు. ఎస్మా ప్రయోగిస్తే ఇందిరాగాంధీకి (Indira Gandhi) పట్టినగతే జగన్‌కూ పడుతుందని నారాయణ హెచ్చరించారు. జగన్ తల్లి లాంటి అంగన్‌వాడీలపై ఎస్మా ప్రయోగిస్తే ఆ పాపం ఊరికేపోదన్నారు.

అదే అతడి నాశనానికి కారణమవుతుందని హెచ్చరించారు. దేశద్రోహులపై, ఎర్రచందనం స్మగ్లర్లపై ఎస్మా చట్టం ప్రయోగించాలని అన్నారు. ఎమర్జెన్సీ సమయంలో ఇందిరాగాంధీ ఎస్మా ప్రయోగించారని.. రాజకీయంగా ఆమె పతనమయ్యారని నారాయణ గుర్తుచేశారు.

ఎస్మా చట్టం అమలు చేసి ఎంతమందిని అరెస్ట్ చేస్తారో చేయండని సవాల్ విసిరారు. అదే పని గనక చేస్తే జైళ్లు సరిపోవని.. మీరు అందరికీ అన్నం పెట్టలేరని ఎద్దేవా చేశారు. అంగన్‌వాడీల పోరాటం కొనసాగుతోందని, వారికి మద్దతుగా తాము నిలబడతామని నారాయణ స్పష్టం చేశారు.

వైసీపీ ప్రభుత్వం(YCP Government)లో మార్పులు, చేర్పుల వ్యవహారం కొన్ని ప్రాంతాల్లో చర్చనీయాంశమైంది. ఈ నేపథ్యంలో ఉమ్మడి అనంతపురం(Ananthapuram)లో ఉన్న రెండూ ఎంపీ స్థానాలనూ.. మూడు అసెంబ్లీ స్థానాలను వైసీపీ అధిష్టానం మార్చేసింది. అంతేకాదు మరో నాలుగు స్థానాల్లో మార్పు చేర్పులు ఉండొచ్చంటూ సంకేతాలు ఇచ్చింది. ముఖ్యంగా సింగనమల, మడకశిర, రాయదుర్గం అసెంబ్లీ స్థానాల్లో మార్పు ఖాయమైనట్లు జోరుగా ప్రచారం సాగుతోంది.

ఇప్పటికే రాయదుర్గం ఎమ్మెల్యే కాపు రామచంద్రారెడ్డి పార్టీకి రాజీనామా చేశారు. ఈ క్రమంలో సింగనమల ఎమ్మెల్యే(Singanamala MLA) జొన్నలగడ్డ పద్మావతి(Jonnalagadda Padmavathi) సోషల్ మీడియా వేదికగా సంచలన వ్యాఖ్యలు చేశారు. ‘సింగనమల నియోజకవర్గం అంటే అంత చిన్న చూపు ఎందుకు? ఒక ఎస్సీ మహిళను కాబట్టేనా? నియోజకవర్గానికి నీళ్లు తీసుకురావాలంటే ప్రతీసారి యుద్ధం చేయాల్సివస్తోంది.

కనీసం ఒక్క చెరువుకు నీటినైనా వదలమంటే జిల్లా అధికారుల్లో చలనం లేదు.’ అంటూ ఆవేదన వ్యక్తం చేశారు. ఇదే సమయంలో అనంతపురం ఎమ్మెల్యే అనంత వెంకటరామిరెడ్డి, తాడపత్రి ఎమ్మెల్యే కేతిరెడ్డి పెద్దారెడ్డిపై పరోక్షంగా విమర్శలు గుప్పించారు. ‘ఎస్సీ మహిళనైతే మీ కాళ్లు పట్టుకోవాలా..? అందరి కింద అణిగి మణిగి ఉండాలా? నీటి వాటా మాట్లాడితే పెద్ద నేరం.. ఈ ఐదేళ్లలో ఎన్నోసార్లు ఇబ్బంది పెట్టారు.’ అంటూ ఆవేదన వ్యక్తం చేశారు.

తాను గడపగడప కార్యక్రమాన్ని విజయవంతంగా నిర్వహించామని ఎమ్మెల్యే పద్మావతి అన్నారు. 2014 – 2019 లాగే క్యాస్ట్ ఈక్వేషన్ 2024లో ఉంటాయన్నారు. తాను అభ్యర్థిగా పనికిరానప్పుడు తాను చెప్పిన అభ్యర్థిని ఎలా నిలబెడతారని నిలదీశారు. ఎమ్మెల్యే అభ్యర్థిగా తన పేరును ప్రకటించాకే బస్సు యాత్ర చేపట్టాలన్న మంత్రి పెద్దిరెడ్డి రామచంద్రారెడ్డి మాట తప్పారని అన్నారు. తెర వెనుక ఏమైనా జరిగితే చెప్పలేమంటూ సంచలన వ్యాఖ్యలు చేశారు.