Featured

– బీఆర్ఎస్ ఫస్ట్ లిస్ట్ రెడీ
– అతి త్వరలో ప్రకటన
– సైలెంట్ గా సర్వేలు చేయిస్తున్న కాంగ్రెస్
– రేపటి నుంచి అభ్యర్థుల ఎంపికకు దరఖాస్తుల స్వీకరణ
– ఐదు రాష్ట్రాలపై బీజేపీ ఫోకస్
– ఆచితూచి అభ్యర్థుల ప్రకటన
– అందరి టార్గెట్ 80 సీట్ల పైనే!
– వ్యూహప్రతివ్యూహాల్లో బిజీబిజీ

దేశంలో త్వరలో ఐదు రాష్ట్రాలకు అసెంబ్లీ ఎన్నికలు జరగనున్నాయి. అయితే.. అందరి చూపు తెలంగాణ (Telangana) వైపే ఉంది. జాతీయ రాజకీయాల జపం చేస్తున్న కేసీఆర్ (KCR) కు ఈసారి గెలుపు చాలా కీలకం. ఇక్కడ గెలిస్తేనే అక్కడ సత్తా చాటగలరు. కర్ణాటక (Karnataka) ఇచ్చిన బూస్టప్ తో తెలంగాణలోనూ పాగా వేయాలనేది కాంగ్రెస్ (Congress) ప్లాన్. ఈ క్రమంలోనే సర్వేల్లో తలమునకలైంది. ఇక బీజేపీ (BJP) ఐదు రాష్ట్రాలను కైవసం చేసుకోవాలని ప్రణాళికలు రచిస్తోంది. దీనికోసం గెలుపు గుర్రాలను బరిలోకి దించాలని ఆచితూచి అడుగులు వేస్తోంది.

వారం పది రోజుల నుంచి బీఆర్‌ఎస్‌ అభ్యర్థుల తొలి జాబితా రెడీ అయిపోయిందనే వార్తలు బాగా వినిపిస్తున్నాయి. అంతే కాకుండా ఓ లిస్టు కూడా సోషల్ మీడియాలో వైరల్‌ అవుతోది. 80 మందికి పైగా అభ్యర్థులతో కూడిన జాబితాను ఒకేసారి ప్రకటించి కేసీఆర్ ప్రతిపక్షాలకు ఝలక్ ఇవ్వనున్నట్టు వార్తలు వస్తున్నాయి. ముహూర్తాలు, వాస్తు గట్టిగా నమ్మే కేసీఆర్‌.. శ్రావణ మాసం ప్రారంభం కావడంతో రేపో మాపో లిస్టును విడుదల చేసే అవకాశాలున్నట్లు ప్రచారం జరుగుతోంది. ఇప్పటికే జిల్లాల వారీగా గట్టి అభ్యర్థుల మీద ఫోకస్‌ పెట్టిన కేసీఆర్.. మార్చాల్సిన వారి గురించి కూడా పూర్తి క్లారిటీతో ఉన్నారని అంటున్నారు. ఈసారి గెలుపు చాలా కీలకం కావడంతో అభ్యర్థుల విషయంలో చాలా జాగ్రత్తగా నిర్ణయం తీసుకుంటున్నట్టు తెలుస్తోంది. పార్టీ నేతలు 80కి పైగా స్థానాల్లో గెలుస్తామని అంటుంటే.. మంత్రి కేటీఆర్ మాత్రం మన టార్గెట్ వంద అంటూ ఆపార్టీ శ్రేణులకు హితబోధ చేస్తున్నారు.

కర్ణాటక గెలుపుతో ఊపు మీదున్న కాంగ్రెస్.. తెలంగాణలో పాగా వేయాలని చూస్తోంది. బలమైన అభ్యర్థులను బరిలో నిలపాలని నిర్ణయించింది. ఈనెల 25 వరకు ఆశావాహుల నుంచి దరఖాస్తులు స్వీకరించేందుకు ఏర్పాట్లు చేసింది. వచ్చిన దరఖాస్తులను ఎన్నికల కమిటీ స్క్రీనింగ్​ నిర్వహించి అభ్యర్థుల జాబితాను రూపొందిస్తారు. వచ్చేనెల మొదటి వారంలోగా దరఖాస్తులను పరిశీలించి.. అదే నెల రెండో వారంలో 40 మందితో కూడిన తొలి జాబితాను విడుదల చేయాలని కాంగ్రెస్​ భావిస్తున్నట్టు సమాచారం. అయితే.. కాంగ్రెస్​ లో 70కి పైగా సెగ్మెంట్లలో టిక్కెట్ల కోసం తీవ్రమైన పోటీ ఉంది. బీఆర్ఎస్ మాదిరిగానే పలు నియోజకవర్గాల్లో ముగ్గురు, నలుగురు ఆశావాహులు టిక్కెట్ల కోసం ప్రయత్నాల్లో ఉన్నారు. రానున్న రోజుల్లో ఈ వహారం హస్తంలో ఎలాంటి అలజడి రేపుతుందోననే ఆసక్తి నెలకొంది. ఇటు సైలెంట్ గా సర్వేలు చేస్తోంది కాంగ్రెస్. ఈసారి 80కి పైగా స్థానాల్లో గెలుపు అవకాశాలున్నాయని తమ సర్వేల్లో తేలిందని ఆయా వర్గాలు అంటున్నాయి.

మరోవైపు, బీజేపీ దూకుడు మీదుంది. ఎన్నికలు జరగనున్న తెలంగాణ, మధ్యప్రదేశ్, ఛత్తీస్ గఢ్, రాజస్థాన్, మిజోరాం రాష్ట్రాల్లో అభ్యర్థులపై ఫోకస్ పెంచింది. ఈ నేపథ్యంలో మధ్యప్రదేశ్, ఛత్తీస్ గఢ్ లో తొలి జాబితాను రిలీజ్ చేసింది. ఈ ప్రకటనతో మిగతా పార్టీలు తమకంటే వెనుకున్నాయనే సంకేతాన్నిచ్చింది. త్వరలోనే మిగతా స్థానాలకు అభ్యర్థులను ఖరారు చేసే పనిలో ఉంది. అలాగే, మిగిలిన మూడు రాష్ట్రాల అభ్యర్థులపైనా కసరత్తులు చేస్తోంది. ముఖ్యంగా తెలంగాణలో ఎన్నికలను ప్రతిష్టాత్మకంగా తీసుకున్న పార్టీ.. అభ్యర్థుల విషయంలో ఆచితూచి అడుగులు వేస్తోంది. కాంగ్రెస్ కు స్కోప్ లేదని.. బీఆర్ఎస్ 30 స్థానాలకు లోపే పరిమితం అవుతుందని అనుకుంటున్నారు కమలనాథులు. ఈసారి ప్రజలు కాషాయ పార్టీకి ఓటేసేందుకు నిర్ణయం తీసుకున్నారని ధీమాగా చెబుతున్నారు. మొత్తంగా ఎన్నికలు దగ్గర పడుతుండడంతో పార్టీలు అభ్యర్థుల వేటలో పడ్డాయి. 80 సీట్లే లక్ష్యంగా ముందుకు సాగుతున్నాయి.

రెండేళ్ల క్రితం జరిగిన మరియమ్మ లాకప్ డెత్ ఘటన.. పోలీస్ శాఖకు మాయని మచ్చగా మిగిలిపోయింది. ఈ ఘటన రాష్ట్రవ్యాప్తంగా సంచలనం కావడంతో ప్రభుత్వంపైనా విమర్శలు వచ్చాయి. కానీ, ఇప్పటికీ ఎలాంటి మార్పూ లేదని ఎల్బీనగర్ లో తాజాగా జరిగిన ఘటన రుజువు చేసింది. అకారణంగా మహిళను చావగొట్టారు పోలీసులు. దీనిపై ఉన్నతాధికారులు చర్యలు తీసుకున్నా.. విమర్శలపాలు అవ్వాల్సి వచ్చింది.

అసలేం జరిగింది..?

బాధితురాలి కథనం ప్రకారం.. ఆమె మీర్ పేట్ మున్సిపల్ కార్పొరేషన్ పరిధిలోని నందిహిల్స్ కాలనీ రోడ్ నెంబర్ 4లో ఉంటోంది. కుమార్తె పెళ్లి కోసం సరూర్‌ నగర్‌ లోని బంధువుల ఇంటికి డబ్బుల కోసం వెళ్లింది. ఆగస్టు 15న రాత్రి తిరిగి ఎల్బీనగర్‌ కు రాగా పోలీసులు ఆపారు. ఎవరు నువ్వు..? ఇక్కడేం చేస్తున్నావు..? ఏంటీ కథ..? అంటూ ప్రశ్నల వర్షం కురిపించారు. తాను ఫలానా అని చెప్పినా వినిపించుకోలేదు. అన్నీ తెలుసులే.. అంటూ వెటకారంగా మాట్లాడుతూ.. ఆమెను తమ వాహనంలో బలవంతంగా ఎక్కించుకుని పోలీస్ స్టేషన్‌ కు తీసుకువెళ్లారు. చిత్రహింసలకు గురిచేయడమే కాకుండా రాత్రంతా పోలీస్ స్టేషన్ లో ఉంచి థర్డ్ డిగ్రీ ప్రయోగించారు. ఎదురు తిరిగితే నీ సంగతి తెలుసు అంటూ.. ఇబ్బందులకు గురి చేశారని బాధితురాలు వాపోతోంది. ఉదయం ఓ అధికారి ఆదేశాల మేరకు బాధితురాలిని ఎల్బీనగర్ పోలీసులు వదలిపెట్టారు. ఈ దాడిలో ఆమె నడవలేని స్థితికి చేరుకుంది. అకారణంగా పోలీసులు తనని కొట్టారని బాధితురాలు ఆవేదన వ్యక్తం చేసింది.

ఉన్నతాధికారుల చర్యలు

ఈ విషయం మీడియాకు తెలియడంతో తాజాగా వెలుగులోకి వచ్చింది. సోషల్ మీడియాలో నెటిజన్లు ప్రశ్నిస్తూ కామెంట్స్ పెడుతున్నారు. ఈ నేపథ్యంలో రాచకొండ సీపీ చౌహాన్ స్పందిస్తూ.. ఘటనకు సంబంధించి ఇద్దరు పోలీసులపై వేటు వేసినట్టు తెలిపారు. దాడికి పాల్పడ్డ హెడ్ కానిస్టేబుల్ శివ శంకర్, మహిళా కానిస్టేబుల్ సుమలతను సస్పెండ్ చేస్తూ ఆదేశాలు జారీ చేసినట్టు చెప్పారు. ఈ ఘటనపై విచారణ చేసి నివేదిక తెప్పించుకున్న సీపీ.. ఇద్దరు పోలీసులపై చర్యలు తీసుకున్నారు.

– బీఆర్ఎస్ ఆఫీసుల స్థల కేటాయింపుల కేసు
– హైకోర్టులో విచారణ
– ఎకరా వంద కోట్లకు అమ్ముడవుతుంటే..
– గజం వంద రూపాయలకే ఎలా?
– పిటిషనర్ న్యాయవాది ప్రశ్న
– కౌంటర్ దాఖలు చేయాలన్న న్యాయస్థానం
– ఎకరాకు 100 కోట్ల బెంచ్ మార్క్ తీర్పు..
– గుర్తు చేస్తూ కీలక వ్యాఖ్యలు
– విచారణ 3 వారాలకు వాయిదా

బీఆర్ఎస్ (BRS) ఆఫీసులకు స్థల కేటాయింపుల కేసుపై హైకోర్టు (High Court) లో విచారణ జరిగింది. ఈ కేసులో సీఎం కేసీఆర్ (CM KCR) ఐదో ప్రతివాదిగా ఉన్నారు. కోకాపేటలో రూ.100 కోట్లకు ఎకరం జాగా అమ్ముతున్న ప్రభుత్వం.. అధికార పార్టీకి మాత్రం చదరపు గజం కేవలం రూ.100 కే కేటాయించిందని పిటిషనర్ల తరఫు న్యాయవాది చిక్కుడు ప్రభాకర్ వాదనలు వినిపించారు.

మార్కెట్ ధరలతో పొంతన లేకుండా పార్టీ ఆఫీసులకు కారు చౌకగా భూముల్ని కేటాయించడాన్ని సవాలు చేస్తూ గతేడాది దాఖలైన పిటిషన్‌ పై చీఫ్ జస్టిస్ అలోక్, జస్టిస్ వినోద్ కుమార్‌ లతో కూడిన బెంచ్ బుధవారం విచారణ జరిపింది. ఈ సందర్భంగా హైదరాబాద్ తో పాటు జిల్లా కేంద్రాల్లో కలిసి మొత్తం 34 ఎకరాల స్థలాన్ని పార్టీ ఆఫీసుల కోసం తీసుకున్నారని తెలిపారు చిక్కుడు ప్రభాకర్. ఆ స్థలాల్లో ఆఫీసులు కూడా నిర్మించారని న్యాయస్థానానికి విన్నవించారు.

ఈ కేసులో 16 నెలలుగా ప్రభుత్వం కౌంటర్లు దాఖలు చేయడం లేదని తెలిపారు. వాదనలు అనంతరం కోర్టు కౌంటర్ దాఖలు చేయాలని ప్రభుత్వాన్ని ఆదేశించింది. కౌంటర్ అఫిడవిట్‌ ను ప్రభుత్వం లేదా బీఆర్ఎస్ పార్టీ అధినేతగా కేసీఆర్ దాఖలు చేయకపోయినా మార్కెట్‌ లో అమ్ముడుపోతున్న ధరకే కేటాయించాల్సిందిగా ఉత్తర్వులు ఇవ్వాల్సి వస్తుందని అభిప్రాయపడింది. కేసు విచారణను మూడు వారాలకు వాయిదా వేసింది.

హైదరాబాద్ సహా మొత్తం 33 జిల్లాల్లో బీఆర్ఎస్ పార్టీ ఆఫీసులకు గజం రూ.100 చొప్పున ప్రభుత్వం కేటాయించగా కొన్ని జిల్లాల్లో ఆఫీసుల నిర్మాణం పూర్తయ్యి ప్రారంభోత్సవాలు జరిగాయి. ఇంకొన్ని సిద్ధంగా ఉన్నాయి. ఈ నేపథ్యంలో గతంలో సుప్రీంకోర్టు వెలువరించిన ఉత్తర్వులను ప్రస్తావిస్తూ తెలంగాణలో బీఆర్ఎస్ ఆఫీసులకు కూడా రూ.100 కోట్ల చొప్పున ఎకరానికి ధర చెల్లించేలా ఆదేశాలు ఇవ్వాల్సి వస్తుందని బెంచ్ మౌఖికంగా అభిప్రాయపడిందని.. పిటిషనర్ తరఫు న్యాయవాది అంటున్నారు. ఈ నేపథ్యంలో తదుపరి విచారణ సందర్భంగా ఎలాంటి అంశాలు వాదనలకు వస్తాయన్నది ఇంట్రస్టింగ్ గా మారింది.

– క్రీడాశాఖలో వరుస వివాదాలు
– మొన్న స్పోర్ట్స్ స్కూల్ లో..
– ఇప్పుడు మంత్రి పేషీలో..
– మీడియా ముందుకొచ్చిన బాధిత క్రీడాకారిణి

ఓవైపు హకీంపేట స్పోర్ట్స్ స్కూల్ వ్యవహారంపై కమిటీ విచారణ జరుపుతోంది. నిజానాలేంటో బయటకు తీసుకొచ్చే పనిలో ఉంది. బాలికలు లైంగిక వేధింపులకు గురయ్యారా? లేదా? అనేది పలు కోణాల్లో విచారణ జరిపి రిపోర్ట్ తయారు చేస్తోంది కమిటీ. ఈ వివాదంలో మంత్రి శ్రీనివాస్ గౌడ్ ను బర్తరఫ్ చేయాలని ప్రతిపక్షాలు డిమాండ్ చేస్తున్నాయి. ఇలాంటి సమయంలో మంత్రి పేషీలో పని చేసే ఉద్యోగి సురేంద్ర ఓ క్రీడాకారిణిని వేధించిన విషయం వెలుగులోకి వచ్చింది.

అంతర్జాతీయ వేదికల్లో సత్తా చాటిన ఆ క్రీడాకారిణి తాజాగా మీడియా ముందుకొచ్చింది. మహిళా క్రీడాకారులకు భద్రత లేకుండా పోయిందని, చాలా మంది రకరకాలుగా వేధిస్తున్నారని ఆవేదన వ్యక్తం చేసింది. కొంతమంది కోచ్‌ లు కామాంధులుగా మారారని ఆరోపించింది. కొందరు బయటకు చెప్పుకోలేక కుమిలిపోతున్నారని తాను మాత్రం ధైర్యంగా ఫైట్ చేశానని చెప్పుకొచ్చింది.

మహిళా క్రీడాకారులపై జరుగుతున్న వేధింపులపై ప్రభుత్వం దృష్టిసారించాలని కోరింది. సురేంద్ర వేధింపుల వ్యవహారం మినిస్టర్‌ కు తెలియకుండా ఉంటుందని అనుకోవడం లేదని తెలిపింది. అంతర్జాతీయంగా ఎన్నో అవార్డులు సాధించినా కూడా.. మంత్రి పేషీ నుంచే వేధింపులు వస్తాయని ఊహించలేదని చెప్పింది. చాలాసార్లు క్రీడా శాఖ మంత్రిని కలిసేందుకు ప్రయత్నించానని మెడల్ వచ్చిన ప్రతిసారి శాలువా కప్పి పంపిస్తారని మాట్లాడేందుకు అవకాశమే ఉండదని ఆవేదన వ్యక్తం చేసింది.

తనను వేధిస్తున్న సురేంద్రకు గట్టిగా వార్నింగ్ ఇచ్చానని.. తన బాబాయ్‌ తో మాట్లాడి క్షమాపణలు కోరడంతో అతడిని క్షమించానని తెలిపింది. తర్వాత, తనను వేధించడం మానుకున్న సురేంద్ర ఇతర క్రీడాకారిణిలను వేధిస్తున్నాడని తెలిసి ఈ విషయాన్ని బయటకు చెబుతున్నానని చెప్పింది బాధిత క్రీడాకారిణి.

– విచ్చలవిడిగా ప్రభుత్వ భూముల విక్రయం
– యథేచ్ఛగా అమ్మేస్తున్న కేసీఆర్ సర్కార్
– మోకిల ఫేజ్‌-2లో అమ్మకాలకు నోటిఫికేషన్
– 300 ప్లాట్లలో 98,975 గజాల భూమి
– వేలానికి సిద్ధమైన హెచ్ఎండీఏ
– రూ.800 కోట్ల ఆదాయం వస్తుందని అంచనా
– ఈనెల 21 వరకు రిజిస్ట్రేషన్‌ కు అవకాశం
– రిజిస్ట్రేషన్‌ తో పాటు లక్ష రూపాయల డిపాజిట్‌
– చదరపు గజానికి రూ.25 వేల కనీస ధర
– గత వేలంలో గరిష్ఠంగా గజానికి రూ.1.05 లక్షలు

ఎన్ని విమర్శలు వస్తున్నా.. ఎంతమంది చెప్తున్నా… కేసీఆర్ ప్రభుత్వం మాత్రం తన పంథా మార్చుకోవడం లేదు. ప్రభుత్వ భూముల అమ్మకం విషయంలో ఒకప్పుడు నానా రాద్ధాంతం చేసిన బీఆర్ఎస్.. ఇప్పుడు విచ్చలవిడిగా భూముల విక్రయాలు జరుపుతోంది. ఇప్పటికే పలుచోట్ల అమ్మకాలు జరిపిన సర్కార్ తాజాగా.. రంగారెడ్డి జిల్లా మోకిల ఫేజ్‌-2లో 300 ప్లాట్ల అమ్మకానికి నోటిఫికేషన్‌ విడుదల చేసింది.

మొత్తం 300 ప్లాట్లలో 98,975 గజాలను ప్రభుత్వం అమ్మకానికి పెట్టింది. లే అవుట్‌ లో 300 నుంచి 500 గజాల వరకు ప్లాట్లు అందుబాటులో ఉన్నాయి. 98,975 గజాల అమ్మకంతో రూ.800 కోట్లు ఆదాయం వస్తుందని కేసీఆర్ ప్రభుత్వం అంచనా వేసింది. ఈ వేలంలో పాల్గొనేందుకు ఈనెల 21 వరకు రిజిస్ట్రేషన్‌ కు అవకాశం కల్పించింది హెచ్ఎండీఏ.

వెయ్యి 180 రూపాయలు చెల్లించి రిజిస్ట్రేషన్‌ చేసుకోవాలని నోటిఫికేషన్‌ లో తెలిపింది. రిజిస్ట్రేషన్‌ తో పాటు లక్ష రూపాయల డిపాజిట్‌ కంపల్సరీ. చదరపు గజానికి రూ.25 వేల కనీస ధరగా నిర్ణయించింది. మోకిల తొలి ఫేజ్‌ వేలంలో గరిష్ఠంగా గజం రూ.1.05 లక్షలు, కనిష్ఠంగా రూ.72 వేలు పలికింది.

సోమవారం రిజిస్ట్రేషన్ ప్రారంభం కాగా.. 17న ప్రీ బిడ్డింగ్ మీటింగ్, 21న రిజిస్ట్రేషన్, అమౌంట్ డిపాజిట్ కు చివరి తేదీగా నిర్ణయించింది హెచ్ఎండీఏ. అలాగే, 23న ఉదయం 11 గంటల నుంచి మధ్యాహ్నం 2 గంటల వరకు 30 ప్లాట్లకు ఈ-వేలం ఉంటుంది. 24న మధ్యాహ్నం 3 గంటల నుంచి సాయంత్రం 6 గంటల వరకు 30 ప్లాట్లకు, 25, 28, 29 తేదీల్లో- రెండు సెషన్లలో రోజుకు 60 ప్లాట్ల చొప్పున ఈ-వేలం జరగనుంది.

మాజీ మంత్రి ఏ. చంద్రశేఖర్ (Chandrasekhar) బీజేపీ క్రియాశీల సభ్యత్వానికి రాజీనామా చేస్తున్నట్టు ప్రకటించారు.ఈ మేరకు ఆయన టీబీజేపీ అధ్యక్షుడు కిషన్ రెడ్డికి లేఖ రాశారు. 30 సంవత్సరాల తన రాజకీయ ప్రస్థానంలో ప్రజల మేలు కోసం, వారి అభీష్టం మేరకే రాజకీయాల్లో ఉంటున్నానని ఆయన పేర్కొన్నారు. ’12 మందితో హస్తం గూటికి’ అని చంద్రశేఖర్ భవిష్యత్ కార్యాచరణపై ‘రాష్ట్ర’ ముందే ప్రకటించింది. అదే నిజమైంది. తెలంగాణ ప్రజల చిరకాల కోరికైన తెలంగాణ రాష్ట్ర ఏర్పాటు ఉద్యమంలో 12 సంవత్సరాలు పని చేసి ఆ క్రమంలో మంత్రి పదవికి, ఎమ్మెల్యే పదవికి రాజీనామా చేశానని ఆయన తన లేఖలో అన్నారు.

తెలంగాణ రాష్ట్రం ఏర్పడితే ఈ రాష్ట్ర యువతకు ఉద్యోగాలు, రైతుల పొలాలకు నీళ్లు వస్తాయని భావిస్తే అధి కల గానే మిగిలిపోయిందన్నారు. కేంద్రంలో అధికారంలో ఉన్న బీజేపీ (BJP) ప్రభుత్వం, తెలంగాణ ప్రభుత్వాన్ని నివారించి తెలంగాణకు న్యాయం చేస్తుందని భావించి అనేకమంది ఉద్యమనాయకులు బీజేపీలో చేరి భంగపాటుకు గురవుతున్నారని, ప్రస్తుత పరిస్థితుల్లో ఢిల్లీ బీజేపీ సర్కార్ అన్నీ తెలిసి కూడా తెలంగాణ ప్రభుత్వానికి వత్తాసు పలకడం ప్రజా కంటకంగా మారిందని ఆయన ఆరోపించారు.

ఈ పరిస్థితుల్లో తప్పనిసరై రాజీనామా చేస్తున్నానని, మూడు సంవత్సరాల పాటు నాకు సహకరించి నాతో బాటు పని చేసిన నాయకులకు, కార్యకర్తలకు ధన్యవాదాలని చంద్రశేఖర్ తన లేఖలో పేర్కొన్నారు. పార్టీకి పని చేసే నాయకులను ప్రోత్సహించకపోవడం శోచనీయమన్నారు.

కేంద్ర ప్రభుత్వం తెలంగాణ ప్రభుత్వ అన్యాయాలను నిలువరించలేకపోతోందని ఆయన అన్నారు. ఈ నెల 18 న చంద్రశేఖర్ ఢిల్లీలో కాంగ్రెస్ పెద్దల సమక్షంలో పార్టీలో చేరనున్నారు. ఇప్పటికే ఆయన ఈ పార్టీ పెద్దలతో మంతనాలు జరిపారు. 12 మందితో హస్తం గూటికి చంద్రశేఖర్ అని, ‘రాష్ట్ర’ ఎక్స్ క్లూజివ్ గా ఇటీవలే వార్త ప్రకటించింది. సైలెంట్ గా కర్ణాటక డిప్యూటీ సీఎం డీకే. శివకుమార్ తో ఆయన భేటీ అయ్యారని కూడా స్పష్టం చేసింది.

దేశంలోకి ఈసారి రుతుపవనాలు ఆలస్యంగా వచ్చాయి. కానీ, ఎంట్రీ ఇచ్చాక మాత్రం చాలా రాష్ట్రాలు వరుణుడి దెబ్బకు అతలాకుతలం అయ్యాయి. కొద్ది రోజులు ఏకధాటిగా కురిసిన వానలకు (Monsoon Rains) జనం ఇళ్లకే పరిమితం అయ్యారు. ప్రభుత్వాలు విద్యాలయాలకు సెలవులు, ఆఫీసులకు వర్క్ ఫ్రం హోమ్ ఇవ్వాల్సి వచ్చింది. తెలంగాణ (Telangana)లోనూ వానలు బీభత్సం సృష్టించాయి. ముఖ్యంగా గోదావరి పరివాహక జిల్లాల్లో వరదలు (Floods) ముంచెత్తి లోతట్టు గ్రామాలు (Villages) మునిగిపోయాయి. వరద నీటితో జనం అల్లాడిపోయారు.

ఓవైపు వర్షాలు, వరదలతో జనం చస్తుంటే.. ఇంకోవైపు కేసీఆర్ ప్రభుత్వం (KCR Govt) నిర్లక్ష్యం వహించిందనే ఆరోపణలు వచ్చాయి. ప్రతిపక్ష నేతలు సీఎం కేసీఆర్ (CM KCR) ను టార్గెట్ చేస్తూ విమర్శనాస్త్రాలు సంధించారు. సీఎం ప్రగతి భవన్ దాటడం లేదని.. సచివాలయంలో సమీక్షలతోనే కాలం గడుపుతున్నారని మండిపడ్డారు. వరదలపై అంచనా కోసం కేంద్ర బృందం సైతం రాష్ట్రానికి వచ్చింది. ఉమ్మడి ఖమ్మం, వరంగల్ జిల్లాల్లో పర్యటించింది. బాధితులను కలిసి వివరాలు సేకరించింది. కానీ, రాష్ట్ర ప్రభుత్వం సహాయక కార్యక్రమాలు, పరిహారం అంశంలో నిర్లక్ష్యం వహించిందనే ఆరోపణలు చేశారు విపక్ష నేతలు. ఇదే క్రమంలో వివాదం హైకోర్టుకు చేరింది.

రాష్ట్రంలో వర్షాలు, వరదలపై ప్రభుత్వం తీసుకున్న చర్యలపై వివరణ కోరుతూ హైకోర్టులో పిటిషన్ దాఖలైంది. దీనిపై ఇప్పటికే విచారణ జరిపిన న్యాయస్థానం.. తమకు పూర్తిస్థాయి నివేదిక ఇవ్వాలని ప్రభుత్వాన్ని ఇంతకుముందు ఆదేశించింది. శుక్రవారం మరోసారి దీనిపై విచారణ జరిపింది హైకోర్టు. రెండోసారి నివేదికను అందజేసింది ప్రభుత్వం. వరదల ప్రభావంతో 49 మంది మృతి చెందినట్లు రిపోర్ట్ లో పేర్కొంది. అలాగే, రూ.500 కోట్లను పునరావాసం కోసం కేటాయించినట్లు వివరించింది.

అయితే.. రెండోసారి ప్రభుత్వం దాఖలు చేసిన ఈ నివేదిక కూడా అసంపూర్తిగా ఉందని పిటిషనర్ తరుఫు న్యాయవాది చిక్కుడు ప్రభాకర్ వాదించారు. వరద ప్రభావం, నష్టంపై మరో నివేదిక మెమోను కోర్టుకి సమర్పించారు. ఇరు వాదనలు విన్న తర్వాత న్యాయస్థానం ప్రభుత్వంపై అసహనం వ్యక్తం చేసింది. రూ.500 కోట్లు ఎవరికి ఎంత పరిహారం ఇచ్చారో నివేదికలో లేదని తెలిపింది. అలాగే, ఆ నిధులను ఎలా ఖర్చు చేశారో పూర్తి వివరాలతో సమగ్ర నివేదిక ఇవ్వాలని మరోసారి ఆదేశించింది. అంటువ్యాధులతో బాధపడుతున్న వారి విషయంలో ఎలాంటి చర్యలు తీసుకున్నారో తెలపాలని.. చనిపోయిన 49 మంది కుటుంబాలకు ఎంత నష్ట పరిహారం చెల్లించారో సమగ్రంగా నివేదిక సమర్పించాలని స్పష్టం చేసింది. తదుపరి విచారణ వచ్చే గురువారానికి వాయిదా వేసింది న్యాయస్థానం.