National

అయోధ్య(Ayodhya)లో జనవరి 22న జరిగే రామ్ లల్లా(Ram Lala) ప్రతిష్ఠాపన కార్యక్రమానికి భారతీయ జనతా పార్టీ(BJP) అధినేత ఎల్‌కే అద్వానీ(LK Adwani) హాజరు కానున్నట్లు సమాచారం. జనవరి 16 నుంచి ఏడు రోజుల పాటు జరిగే వేడుకలకు అయోధ్యలో భారీ ఎత్తున సన్నాహాలు చేస్తున్నారు.

జనవరి 15 నాటికి పట్టాభిషేక మహోత్సవానికి సన్నాహాలు పూర్తి చేయనున్నారు. అయితే, లాల్ కృష్ణ అద్వానీ, మురళీ మనోహర్ జోషి అనారోగ్యం కారణంగా ఈ కార్యక్రమానికి హాజరయ్యే అవకాశం లేదని ఆలయ ట్రస్ట్ ఇదివరకు తెలిపింది.

తాజాగా, అయోధ్యలో రామ మందిర ప్రారంభోత్సవానికి హాజరు కావాల్సిందిగా వీహెచ్‌పీ డిసెంబరులో సీనియర్ బీజేపీ నేతలు ఎల్‌కే అద్వానీ, మురళీ మనోహర్ జోషిలను ఆహ్వానించింది. వీహెచ్‌పీ ఇంటర్నేషనల్ వర్కింగ్ ప్రెసిడెంట్ అలోక్ కుమార్ మాట్లాడుతూ.. ఎల్‌కే అద్వానీకి అవసరమైన అన్ని ఏర్పాట్లు, వైద్య సదుపాయాలు కల్పిస్తామని చెప్పారు.

జనవరి 22న పరిమిత ఆహ్వానితులతో ప్రధాని నరేంద్ర మోడీ, ఇతర నేతల సమక్షంలో రామాలయంలో ప్రాణ ప్రతిష్ఠ కార్యక్రమం జరగనుంది. ఇప్పటికే దేశవ్యాప్తంగా వేలాది మంది సాధువులను ఆహ్వానించారు. రామమందిరాన్ని నిర్మించిన కార్మికుల కుటుంబాలనూ ఆహ్వానం పలికారు.

భారత్‌ ఎవరినీ శత్రువుగా భావించడం లేదని కేంద్ర రక్షణ శాఖ మంత్రి(Defense Minister) రాజ్‌నాథ్‌సింగ్(Rajnath Singh) అన్నారు. ఆయన బ్రిటన్‌ పర్యటనలో భాగంగా బుధవారం 10 డౌనింగ్ స్ట్రీట్‌లో బ్రిటన్ ప్రధాని రిషి సునక్‌(Britain PM Rishi sunak) , విదేశాంగ మంత్రి డేవిడ్‌ కామెరూన్‌ను కలిశారు. ఈ భేటీలో పలు ద్వైపాక్షిక అంశాలు, రక్షణ, వాణిజ్యం, ప్రాంతీయ అంశాలపై చర్చించారు.

దీంతోపాటు స్వేచ్ఛా వాణిజ్య ఒప్పందం (ఎఫ్ఏ)కు సంబంధించి కొనసాగుతున్న చర్చల పురోగతిపై కూడా మాట్లాడుకున్నారు. అదేవిధంగా బ్రిటన్ విదేశాంగ మంత్రి డేవిడ్ కామెరూన్‌తో భారత్-యుకే సంబంధాలను పెంపొందించడం, ఇరు దేశాల మధ్య సహకారాన్ని మరింతగా బలోపేతం చేయడంపై ఆచరణాత్మక చర్చలు జరిగాయని రాజ్‌నాథ్‌ సింగ్ సోషల్ మీడియా వేదికగా వెల్లడించారు.

రెండు అత్యున్నత స్థాయి సమావేశాల తర్వాత, రాజ్‌నాథ్‌సింగ్ తన కౌంటర్ గ్రాంట్ షాప్‌తో కలిసి యూకే- ఇండియా డిఫెన్స్ ఇండస్ట్రీ సీఈవోల రౌండ్‌టేబుల్ సమావేశానికి సహ- అధ్యక్షుడిగా వ్యవహరించారు. యూకే రక్షణ పరిశ్రమకు చెందిన పలువురు చీఫ్ ఎగ్జిక్యూటివ్ ఆఫీసర్లు, యూకే రక్షణ మంత్రిత్వ శాఖ, యూకే-ఇండియా బిజినెస్‌ కౌన్సిల్, కాన్ఫెడరేషన్ ఆఫ్ ఇండియన్ ఇండస్ట్రీ ప్రతినిధులు హాజరయ్యారు.

రాజ్‌నాథ్‌సింగ్ మాట్లాడుతూ.. భారత్‌తో పాటు మరే దేశంలోనూ డిజిటల్ లావాదేవీల్లో 80కోట్ల మంది ఇంటర్నెట్‌ వినియోగదారులు లేరని అన్నారు. ప్రపంచం మొత్తం మా యూపీఐ యాప్‌ను ఆమోదించిందని, యూపీఐ ద్వారా దాదాపు 130 లక్షల కోట్ల లావాదేవీలు జరిగాయన్నారు. చైనా మౌత్ పీస్ అయిన గ్లోబల్ టైమ్స్ రచయిత రాసిన కథనంలో భారత్ పట్ల చైనా వైఖరిలో భారీ మార్పు వచ్చిందన్నారు.

భారత్‌లో ఆర్థిక, వ్యూహాత్మక మార్పుల కారణంగా భారతదేశ ఆర్థిక వ్యవస్థ వ్యూహాత్మక శక్తిగా మారిందని చైనా ప్రభుత్వం కూడా విశ్వసిస్తోందని తెలిపారు. భారత్, చైనా మధ్య సంబంధాలు బాగా లేవని అభిప్రాయపడ్డారు. ఈ విషయం ప్రపంచానికి తెలుసని తెలిపారు. తాము అందరితో సత్సంబంధాలు మెరుగుపరుచుకోవాలని అనుకుంటున్నట్లు వెల్లడించారు.

దేశీయంగా తయారు చేసిన మానవరహిత వైమానిక వాహనం (Unmanned Aerial Vehicle) దృష్టి-10 స్టార్ లైనర్‌ (Drishti 10 Starliner)ను భారత నావికాదళ చీఫ్‌ అడ్మిరల్‌ ఆర్‌.హరి కుమార్‌ (R. Hari Kumar) ప్రారంభించారు. అదానీ డిఫెన్, ఏరో స్పేస్ సంస్థ ఈ వాహనాన్ని తయారు చేసింది.

హైదరాబాద్‌లో అదానీ ఏరో స్పేస్ లో నిర్వహించిన కార్యక్రమానికి హరికుమార్ ముఖ్యఅతిథిగా హాజరై ఈ వాహానాన్ని ఆయన ఆవిష్కరించారు. రక్షణ, భద్రతలో ‘ఆత్మనిర్భర్త’ను ప్రారంభించేందుకు నేవీ అవసరాలకు అనుగుణంగా, భాగస్వాములు, సామర్థ్యాల, పర్యావరణ వ్యవస్థను ఏర్పాటు చేయడంలో అదానీ గ్రూప్ ప్రయత్నాలను ఈ సందర్బంగా నేవీ చీఫ్ అభినందించారు.

ఐఎస్ఆర్ సాంకేతికత, సముద్ర ఆధిపత్యంలో భారత స్వావలంబన కోసం ఇది ఒక పరివర్తనాత్మక దశ అని తెలిపారు. దృష్టి 10 చేరిక తమ నావికా సామర్థ్యాలను మెరుగుపరుస్తుందన్నారు. గత కొన్నేళ్లుగా అదానీ డిఫెన్స్ అండ్ ఏరోస్పేస్ నిబద్ధతతో, క్రమబద్ధంగా పనిచేస్తోందన్నారు.

దృష్టి డ్రోన్లు.. ఇంటెలిజెన్స్, నిఘా, గూఢచర్య (ఐఎస్ఆర్) కార్యకలాపాలలో దేశ సామర్థ్యాన్ని పెంపొందించేందుకు, సముద్ర జలాల్లో భారత ఆధిపత్యం కొనసాగేందుకు తాజా ఆవిష్కరణ చాలా తోడ్పడుతుందున్నారు. వాటితో నిఘా, గూఢచర్యంలో నేవి మరింత పట్టు సాధిస్తుందని పేర్కొన్నారు.

మణిపూర్‌లో భారత్ జోడో న్యాయ యాత్ర (Bharat Jodo Nyay Yatra)కు లైన్ క్లియర్ అయింది. రాష్ట్రంలో యాత్ర నిర్వహించేందుకు మణిపూర్ (Manipur) ప్రభుత్వం అనుమతిచ్చింది. జనవరి 14న పరిమిత సంఖ్యలో కార్యకర్తలతో ఈ యాత్రను ప్రారంభించనున్నారు. హప్తా కంగ్ జే భంగ్ మైదానం నుంచి యాత్రను ప్రారంభించేందుకు బీరెన్ సింగ్ సర్కార్ అనుమతులు ఇచ్చింది.

జనవరి 14న రాష్ట్రంలో పరిమిత సంఖ్యలో కార్యకర్తలతో యాత్రను ప్రారంభించేందుకు అనుమతి ఇచ్చినట్టు ఇంపాల్ తూర్పు జిల్లా కలెక్టర్ వెల్లడించారు. ఈ యాత్రలో ఎంత మంది పాల్గొంటారు, వాళ్ల పేర్లను ముందుగానే అధికారులకు అందజేయాలని ఆదేశించారు. శాంతి భద్రతలకు భంగం కలిగిస్తే కఠిన చర్యలు ఉంటాయని హెచ్చరించారు.

జనవరి 14న మణిపూర్ నుంచి భారత్ జోడో న్యాయ యాత్రను నిర్వహించాలని కాంగ్రెస్ నిర్ణయించింది. ఈ కార్యక్రమానికి అనుమతులు ఇవ్వాలని ఎనిమిది రోజుల క్రితం రాష్ట్ర ప్రభుత్వానికి కాంగ్రెస్ దరఖాస్తు చేసుకుంది. తాజాగా ఈ రోజు సీఎంతో కాంగ్రెస్ నేతలు భేటీ అయ్యారు. రాష్ట్రంలో శాంతి భద్రతల దృష్ట్యా యాత్రకు అనుమతులు ఇవ్వలేమని సీఎం బీరెన్ సింగ్ చెప్పారని పీసీసీ చీఫ్ మేఘా చంద్ర వెల్లడించారు.

ఈ క్రమంలో యాత్రపై ఉత్కంఠ నెలకొంది. మణిపూర్ సర్కార్ నిర్ణయంపై కాంగ్రెస్ నేతలు తీవ్ర స్థాయిలో మండిపడ్డారు. అయితే షెడ్యూల్‌ ప్రకారమే రాహుల్‌గాంధీ భారత్‌ జోడో న్యాయ్‌ యాత్ర కొనసాగుతుందని ఆ పార్టీ నేతలు వెల్లడించారు. యాత్రకు ఇప్పటికే అన్ని ఏర్పాట్లు పూర్తయ్యాయని తెలిపారు. అందువల్ల ఇంఫాల్‌ లోని మరో ప్రాంతం నుంచి ప్రారంభించాలని నిర్ణయించినట్టు చెప్పారు. ఇంతలోనే అనుమతులు రావడంతో యాత్ర యథావిధిగా కొనసాగనుంది.

జనవరి 22న జరిగే రామ మందిర (Ram Mandhir) ప్రారంభోత్సవానికి తాము హాజరుకాబోవడం లేదని కాంగ్రెస్ (Congress) ప్రకటించింది. అసంపూర్తిగా ఉన్న ఆలయాన్ని బీజేపీ, ఆర్ఎస్ఎస్ నాయకులు కేవలం ఎన్నికల ప్రయోజనాల కోసమే ముందస్తుగా ప్రారంభిస్తున్నట్టు స్పష్టమవుతోందని వెల్లడించింది. అందువల్ల రామ్ లల్లా ప్రాణ ప్రతిష్ట కార్యక్రమ ఆహ్వానాన్ని గౌరవంగా తిరస్కరిస్తున్నట్టు తెలిపింది.

ఈ కార్యక్రమాన్ని బీజేపీ, ఆర్ఎస్ఎస్ ఈవెంట్‌గా కాంగ్రెస్ అభివర్ణించింది. 2019 సుప్రీం కోర్టు తీర్పుకు కట్టుబడి, శ్రీరామున్ని గౌరవించే లక్షలాది మంది భక్తుల మనోభావాలను గౌరవిస్తూ కాంగ్రెస్ జాతీయ అధ్యక్షుడు మల్లికార్జున్ ఖర్గే, పార్టీ మాజీ అధినేత్రి సోనియా గాంధీ, పార్టీ సీనియర్ నేత అధీర్ రంజన్ చౌదరి ఈ ఆర్ఎస్ఎస్, బీజేపీ ఈవెంట్ ఆహ్వానాన్ని తిరస్కరించారని ప్రకటనలో పేర్కొంది.

‘ఈ దేశంలో లక్షలాది మంది భక్తులు భగవాన్ శ్రీ రామున్ని పూజిస్తారు. మతం అనేది వ్యక్తిగత విషయం. కానీ అయోధ్య రామాలయాన్ని బీజేపీ, ఆర్ఎస్ఎస్ ఒక రాజకీయ ప్రాజెక్టుగా మార్చి వేశాయి. అసంపూర్తిగా ఉన్న ఈ ఆలయాన్ని బీజేపీ, ఆర్‌ఎస్‌ఎస్‌ నాయకులు ప్రారంభించడం కేవలం ఎన్నికల లబ్ధి కోసం ఈ అంశాన్ని ముందుకు తెచ్చినట్లు స్పష్టమవుతోంది’అని చెప్పింది.

కాంగ్రెస్ నిర్ణయంపై బీజేపీ తీవ్ర స్థాయిలో విరుచుకు పడింది. త్రేతా యుగంలో రావణుడి లాగానే కాంగ్రెస్ కూడా మతి పోయిందని మండిపడింది. కాంగ్రెస్ నిర్ణయంపై కేంద్ర మంత్రి హర్దీప్ సింగ్ పూరి ఫైర్ అయ్యారు. జనవరి 22న రామ మందిర ప్రారంభోత్సవానికి హాజరు కాకూడదని కాంగ్రెస్ తీసుకున్న నిర్ణయంపై తర్వాత ఆ పార్టీ పశ్చాతాప పడుతుందన్నారు.

కాంగ్రెస్ ‘రామ వ్యతిరేక వైఖరి’ దేశ ప్రజలందరికీ తెలిసిందేనని కేంద్ర మంత్రి స్మృతి ఇరానీ ధ్వజమెత్తారు. రాముడు కల్పిత పాత్ర అని సోనియా గాంధీ నేతృత్వంలో న్యాయస్థానంలో కాంగ్రెస్ అఫిడవిట్ వేసిందన్నారు. ఆ పార్టీ ఇప్పుడు రామాలయం ప్రాణ ప్రతిష్ఠ ఆహ్వానాన్ని తిరస్కరించడం ఆశ్చర్యకరం ఏమీ కాదని ఫైర్ అయ్యారు. సోనియా గాంధీ, కాంగ్రెస్ నేతృత్వంలోని ‘ఇండియా’ కూటమి మరోసారి సనాతన ధర్మాన్ని అవమానించిందన్నారు.

రాముడిని ఊహాజనిత పాత్ర అని పిలిచే వారి నుంచి ఇలాంటి నిర్ణయం కొత్తేమీ కాదన్నారు. అయోధ్యలో బాబ్రీ మసీదును పునర్నిర్మిస్తామని ఒకప్పుడు ఇదే కాంగ్రెస్ హామీ ఇచ్చిందని విరుచుకు పడ్డారు. 2024లో రాముడిని బహిష్కరించిన కాంగ్రెస్‌ పార్టీని ప్రజలు బహిష్కరిస్తారన్నారు. కాంగ్రెస్ అగ్రనేతలు రామ మందిర ప్రారంభోత్సవానికి రావడం లేదని ఆ పార్టీ అధికారిక ప్రకటన విడుదల చేసిందని బీజేపీ నేత నళిన్ కోహ్లీ అన్నారు.

రాముడి ఉనికిని తిరస్కరించిన కాంగ్రెస్ నిర్ణయంలో తమకు ఎలాంటి ఆశ్చర్యం కలగలేదని తెలిపారు. మరోవైపు కాంగ్రెస్ పై బీజేపీ ఎంపీ మనోజ్ తివారి తీవ్రస్థాయిలో నిప్పులు చెరిగారు. త్రేతా యుగం నాటి రామరాజ్యం నేడు ప్రధాని మోడీ పాలనలో భారత్ కు తిరిగి వచ్చిందన్నారు. అయోధ్యలోని రామ మందిరంలో జరిగే ప్రతిష్ఠాపన కార్యక్రమానికి హాజరుకాని వారు జీవితాంతం పశ్చాతాపపడుతురన్నారు.

రాముడి ఆశీస్సులు బీజేపీకి అనుకూలంగా ఉండడంతో కాంగ్రెస్‌ వాళ్లు పూర్తిగా పిచ్చివాళ్లయ్యారని కర్ణాటక మాజీ సీఎం సదానంద గౌడ అన్నారు. గత 10 ఏళ్లుగా ప్రధాని మోడీ చేస్తున్న అభివృద్ధి పనులను ప్రజలు ఆదరిస్తున్నారని వెల్లడించారు. రాబోయే ఎన్నికల్లో దేశంలో కాంగ్రెస్‌కు 50 సీట్లకు మించి రావని సదానంద గౌడ పేర్కొన్నారు.

ప్రపంచంలో అత్యద్భుతమైన నిర్మాణాల్లో అయోధ్య రామ మందిరం (Ram Mandhir)ఒకటి. భారతీయ సంస్కృతి, వారసత్వాలకు ఈ ఆలయం ఒక నిలువెత్తు రూపం. ఎలాంటి ఇనుము ఉపయోగించకుండా ఈ ఆలయాన్ని నిర్మించడం విశేషం. భారీ భూకంపాల (Earthquake)ను తట్టుకుని 2500 ఏండ్లు నిలిచి ఉండేలా ఈ ఆధ్యాత్మిక కట్టడాన్ని నిర్మించారు. ఈ ఆలయ అద్బుతమైన స్ట్రక్చరల్ డిజైన్‌లో కీలక పాత్ర పోషించిన వ్యక్తి హైదరాబాద్ వాసి కావడం రాష్ట్ర ప్రజలు గర్వపడే విషయం.

ప్రఖ్యాత ఆర్కిటెక్ట్ సంస్థ సీబీ సోంపురా రూపొందించిన ప్రతిష్టాత్మక రామమందిర 3D నిర్మాణ విశ్లేషణ, రూపకల్పన బాధ్యతను సీఎస్ఐఆర్, సీబీఆర్ఐ చేపట్టింది. రామ మందిర స్ట్రక్చరల్‌ డిజైన్‌, పునాదుల నిర్మాణాలను సీఎస్ఐఆర్ బృందం సభ్యులు పర్యవేక్షించారు. ఆ బృందంలో సీఎస్ఐఆర్-సీబీఆర్ఐ ప్రస్తుత డైరెక్టర్ డాక్టర్‌ ప్రదీప్‌ కుమార్‌ రామన్‌చెర్ల కీలక పాత్ర పోషించారు.

సుమారు నాలుగేండ్ల పాటు రామ మందిర నిర్మాణంలో సీఎస్ఐఆర్ బృందం ప్రత్యక్షంగా, పరోక్షంగా పర్యవేక్షణ చేసింది. ఎలక్ట్రికల్ రెసిస్టివిటీ టోమోగ్రఫీ (ERT),మల్టి ఛానల్ అనాలిసిస్ ఆఫ్ సర్ఫేస్ వేవ్స్ (MASW)లను చేపట్టింది. డిజైన్ల నిర్మాణ వ్యయం, ఇతర అంశాలను టాటా కన్సల్టెన్సీ సర్వీస్‌ (TCS),నిర్మాణ పనులను ఎల్‌అండ్‌టీ సంస్థలకు అప్పగించింది.

ఈ ఆలయ నిర్మాణంపై ప్రభుత్వ ఆదేశాల మేరకు సోంపురా వంశస్థుల ప్రతినిధులు, టీసీఎస్ అధికారులు, ఎల్‌అండ్‌టీ సంస్థ ఇంజినీర్లు సీబీఆర్ఐ డైరెక్టర్ డాక్టర్‌ ప్రదీప్‌ కుమార్‌ రామన్‌చెర్ల పలుమార్లు ఆలయం డిజైన్ పై చర్చించారు. అనంతరం ప్రభుత్వానికి ఓ నివేదిక అందించారు. నివేదికలో వెల్లడించిన విషయాలతో సంతృప్తి చెందిన ప్రభుత్వం ఆలయ నిర్మాణ పనులు మొదలు పెట్టాలని ఆదేశించింది.

2500 ఏండ్లు నిలిచి పోయేలా ఆలయ స్ట్రక్చరల్‌ డిజైన్‌ను డాక్టర్‌ ప్రదీప్‌ రామన్‌చెర్ల తన టీమ్ తో కలిసి రూపొందించారు. ఆలయ నిర్మాణంలో ఎక్కడా ఇనుమును ఉపయోగించకపోవడం గమనార్హం. మరోవైపు అయోధ్య రామ మందిరానికి సంబంధించిన తలుపులను హైదరాబాద్ కు చెందిన కంపెనీ తయారు చేస్తోంది. బంగారు పూతతో 18 ప్రధాన ద్వారాలు, 100 తలుపులు అత్యంత సుందరంగా తయారు చేస్తున్నారు.

న్యూ బోయినపల్లిలోని అనూరాధ టింబర్ డిపోలో ఈ తలుపులను తయారు చేస్తున్నారు. ఆలయానికి కావాల్సిన 100కు పైగా తలుపులను తాము తయారు చేస్తున్నామని అనురాధ టింబర్ డిపో యజమాని శరత్ బాబు తెలిపారు. రామ మందిర తలుపుల కోసం బల్లార్షా నుంచి ప్రత్యేకంగా తీసుకు వచ్చిన టేకు కర్రను ఉపయోగిస్తున్నామన్నారు. 100 కలప కర్రలను తీసుకుంటే అందులో అత్యంత నాణ్యమైన 20 కలప ముక్కలను తీసుకుని తలుపులను రూపొందిస్తున్నామన్నారు. రామ మందిర తలుపులు తయారు చేసే భాగ్యం తమకు దక్కడం గొప్ప అదృష్టమని పేర్కొన్నారు.

అయోధ్య రామమందిర ప్రాణ ప్రతిష్ఠ ఈనెల 22న జరగనుంది. అయితే.. ఆరోజే ఈ కార్యక్రమం ఎందుకు నిర్వహిస్తున్నారు..? ప్రత్యేకతలు ఏంటనేది తర్వాతి కథనంలో చూద్దాం.

సీఈవో సుచనా సేథ్ (Suchana Seth) తన కుమారున్ని హత్య చేసిన కేసులో పోలీసు ( Police)లు కీలక ఆధారాలు సేకరించారు. బాలుని హత్యకు సుచనా ముందుగానే ప్లాన్ చేసుకున్నట్టు పోలీసులు ప్రాథమికంగా అంచనా వేస్తున్నారు. బాలుని హత్య జరిగిన గదిలో పోలీసులు రెండు దగ్గు మందు సీసాల (Cough syrups)ను స్వాధీనం చేసుకున్నారు.

చాలా వరకు దగ్గు మందులు నిద్రను కలిగించే స్వభావాన్ని కలిగి ఉంటాయని పోలీసులు తెలిపారు. అధిక డోసులో దగ్గు మందును బాలునికి సుచనా పట్టించి ఉంటుందని అంచనా వేస్తున్నారు. ఆ తర్వాత బట్ట లేదా మెత్తతో పిల్లవాడిని చంపి ఉంటుందని పోలీసులు అనుమానిస్తున్నారు. అధిక మోతాదులో దగ్గు మందును పట్టించి ఉండటంతో ఆ బాలుడు గాఢ నిద్రలోకి జారుకుని ఉంటాడని అంటున్నారు.

అందువల్ల మెత్తతో నొక్కి చంపుతున్న సమయంలో పిల్లవాడు కేకలు పెట్టలేకపోయాడని అంచనాకు వచ్చారు. మరోవైపు పోస్టుమార్టమ్‌లో సంచలన విషయాలు వెల్లడయ్యాయి. పిల్ల‌వాడిని బ‌ట్ట లేదా మెత్త‌తో నొక్కి చంపి ఉంటారని పోస్టుమార్టమ్ నివేదిక వెల్లడించింది. ఎక్కడ కూడా చేతి మరకలు లేనట్టు వైద్యులు వెల్లడించారు.

గోవాలో మైండ్‌ఫుల్ ఏఐ ల్యాబ్‌ కంపెనీ సీఈవో సుచనా సేథ్ తన నాలుగేండ్ల కుమారున్ని అత్యంత దారుణంగా హత్య చేసింది. ఆ తర్వాత ఎవరికి ఎలాంటి అనుమానం రాకుండా ఆ బాలుని మృత దేహాన్ని ఓ సూట్ కేసులో పెట్టారు. ఆ తర్వాత ఓ క్యాబ్‌లో సూట్ కేసుతో గోవా నుంచి కర్ణాటక వరకు ట్యాక్సీలో ప్రయాణించారు. ట్యాక్సి డ్రైవర్ సాయంతో పోలీసులు సుచనాను పట్టుకున్నారు. చిత్రదుర్గంలో ఆమెను అరెస్టు చేసి పోలీసులు గోవాకు తీసుకు వచ్చారు.

తన కొడుకును తాను హత్య చేయలేదని సుచనా చెబుతోంది. తాను నిద్ర లేవగానే తన కుమారుడు మరణించి ఉన్నాడని చెప్పింది. సుచనా మాటలను తాము నమ్మడం లేదని పోలీసులు చెబుతున్నారు. చిన్న దగ్గు మందు బాటిల్ కావాలని అపార్ట్ మెంట్ సిబ్బందిని సుచనా కోరారని, ఆ తర్వాత పెద్ద దగ్గు మందు బాటల్ తీసుకుని వచ్చి ఉంటారని అంచనా వేస్తున్నారు.