Politics

175 నియోజకవర్గాల్లో గెలుపే లక్ష్యంగా పెట్టుకున్నామని అందుకే మార్పులు చేర్పులు జరుగుతున్నాయని వైసీపీ(YCP) రీజనల్ కో-ఆర్డినేటర్ వైవీ సుబ్బారెడ్డి(YV Subbareddy) తెలిపారు. విశాఖ నార్త్ నియోజకవర్గంలో సంక్రాంతి సంబరాల్లో పాల్గొన్న ఆయన.. ఈ సందర్భంగా మాట్లాడుతూ.. 175 నియోజకవర్గాల్లో గెలుపే లక్ష్యంగా మార్పులు చేస్తున్నామన్నారు.

ఉత్తరాంధ్రలో బీసీలకు ప్రాధాన్యత ఇవ్వడానికి విశాఖ ఎంపీ అభ్యర్థిగా బొత్స ఝాన్సీకి అవకాశం కల్పించామని తెలిపారు. కుటుంబ పరంగా తాము సీట్లను ఇవ్వడం లేదని, ప్రజల్లో బలం, అర్హత ఉన్న వాళ్లకే అవకాశం కల్పిస్తున్నట్లు స్పష్టం చేశారు. చంద్రబాబు అన్ని వర్గాలను రెచ్చగొట్టి దుష్ప్రచారం చేస్తున్నారని వైవీ సుబ్బారెడ్డి మండిపడ్డారు.

మరోవైపు కాపు ఉద్యమనేత ముద్రగడ పద్మనాభం జనసేనలో చేరుతున్న విషయం తనకు తెలియదంటూ దాటవేశారు. ఇక, ప్రపంచ స్థాయిలో అభివృద్ధి చేయాల్సిన విశాఖను గత ప్రభుత్వం నిర్లక్ష్యం చేసిందని ఆరోపించారు. వైఎస్ఆర్ కాంగ్రెస్ పార్టీ ప్రభుత్వం చొరవతో క్లీన్ సిటీగా విశాఖపట్నం జాతీయ స్థాయిలో నాలుగో స్థానానికి చేరుకుందని సుబ్బారెడ్డి సంతోషాన్ని వ్యక్తం చేశారు.

ఇక, ఎన్నికలకు సిద్ధం అవుతోన్న వైఎస్ఆర్ కాంగ్రెస్ పార్టీ అభ్యర్థుల్లో మార్పులు, చేస్తోంది. ఈ క్రమంలో అసంతృప్త నేతలు పార్టీ నుంచి ఒక్కొక్కరిగా బయటకు వస్తున్నారు. వచ్చే ఎన్నికల్లో విజయమే లక్ష్యంగా కొన్ని అభ్యర్థులను మారుస్తూ వస్తున్నారు సీఎం వైఎస్ జగన్. ఇప్పటికే మూడు జాబితాలు విడుదల చేయగా.. ఇప్పుడు నాల్గో లిస్టుపై వైసీపీ అధిష్టానం కసరత్తు చేస్తోంది.

తెలంగాణ(Telangana)లో అధికారాన్ని చేజిక్కించుకున్నకాంగ్రెస్ పార్టీ(Congress Party) ఇప్పుడు ఏపీలో పాగా వేసే దిశగా ప్రయత్నాలను మొదలుపెట్టింది. ఈ నేపథ్యంలో ఏపీసీసీ చీఫ్(APCC Chief ) గిడుగు రుద్రరాజు(Gidugu Rudraraju)ఆసక్తికర వ్యాఖ్యలు చేశారు.

విజయవాడ(Vijayawada)లో శుక్రవారం ఆయన మీడియాతో మాట్లాడుతూ.. కొందరు సిట్టింగ్ ఎమ్మెల్యేలు, మాజీలు కాంగ్రెస్ పార్టీతో టచ్‌లో ఉన్నారని తెలిపారు. ఎమ్మెల్యేలను, ఎంపీలను స్థానాలను మారిస్తే, ఒకచోట చెల్లనిది మరోచోట ఎలా చెల్లుబాటవుతుందని ప్రశ్నించారు.

బలహీనవర్గాల నాయకులను తక్కువ చేయడానికే ఈ మార్పులు చేస్తున్నారని విమర్శించారు. ఇక, బీసీ కార్పొరేషన్ల చైర్మన్లకు ఎలాంటి అధికారాలు లేకుండా చేశారని ఆరోపించారు. టీడీపీ ఇద్దరితోనే నడుస్తోందని, ఇక వైసీపీ కార్యవర్గ సమావేశం ఎప్పుడు జరిగిందో తెలీదంటూ సెటైర్లు విసిరారు. పార్టీ నాయకుల మనోభావాలను కాంగ్రెస్ రాష్ట్ర వ్యవహారాల ఇన్‌చార్జి మాణిక్యం ఠాకూర్ తెలుసుకున్నారని తెలిపారు.

కాంగ్రెస్ పార్టీ ఆధ్వర్యంలో ఒంగోలులో యువభేరి నిర్వహించనున్నట్లు రుద్రరాజు అన్నారు. జిల్లా కాంగ్రెస్ కమిటీలు, మండలాధ్యక్షులను నియమించుకున్నామని, పార్టీ బలోపేతానికి కృషి చేస్తున్నామని వెల్లడించారు. రాష్ట్రంలో యువత మత్తు పదార్థాలకు బానిస అవుతోందని ఆవేదన వ్యక్తం చేశారు. వేల కోట్ల రూపాయల మద్యం రాష్ట్రంలో అమ్ముడవుతోందని ఆరోపించారు.

ఏపీ రాజకీయాల్లో(AP Politics) కీలక పరిణామాలు చోటు చేసుకుంటున్నాయి. వైసీపీ(YCP)లో మార్పులు, చేర్పుల నేపథ్యంలో పలువురు కీలక నేతలు సైతం పక్క చూపులు చూస్తున్నారు. తాజాగా మాజీ మంత్రి(Ex Minister) కొణతాల రామకృష్ణ(Konathala Ramakrishna) అదేబాట పట్టారు. ఆయన త్వరలోనే జనసేన అధినేత పవన్‌కల్యాణ్‌తో భేటీ కానున్నట్లు ప్రచారం సాగుతోంది.

మాజీమంత్రి రామకృష్ణ అనకాపల్లిలో తన అనుచరులతో సమావేశం ఏర్పాటు చేసుకుని జనసేనలో చేరికపై కొణతాల క్లారిటీ ఇస్తారని ఆయన అనుచరులు చెబుతున్నారు. అయితే, వచ్చే ఎన్నికల్లో అనకాపల్లి పార్లమెంట్ స్థానం నుంచి బరిలోకి దిగాలని కొణతాల అనుకుంటున్నారట. అందుకు అనుగుణంగా తన వ్యూహాలకు పదును పెడుతున్నట్లు తెలుస్తోంది.

కొణతాల రామకృష్ణ కాంగ్రెస్ హయాంలో ఉత్తరాంధ్ర రాజకీయాల్లో కీలక పాత్ర పోషించారు. ఉమ్మడి విశాఖజిల్లాలో గరవ సామాజిక వర్గం ప్రతినిధిగా చెలామణి అయ్యారు. నాలుగు దశాబ్దాల రాజకీయ అనుభవంలో పదేళ్లు పదవుల్లో ఉన్నారు. 1989లో కాంగ్రెస్ పార్టీ తరఫున అనకాపల్లి ఎంపీగా పోటీ చేసి కేవలం తొమ్మిది ఓట్ల తేడాతో గెలుపొందడం అప్పట్లో సంచలనంగా మారింది.

2009లో ఆయన ఓటమిని చవిచూశారు. అయినప్పటికీ కొంత కాలం ఆయన రాజకీయాల్లోనే కొనసాగారు. ఆ తర్వాత జరిగిన పరిణామాల్లో కాంగ్రెస్‌ను వీడి వైసీపీలో చేరారు. అప్పట్లో పార్టీకి సంబంధించిన ముఖ్య నిర్ణయాల్లో ఆయన భాగస్వామ్యం ఉండేది. 2014లో పార్టీ ఓడిపోవడం, విశాఖ ఎంపీ సీటులో ఎదురైన వైఫల్యాలు కొణతాలకు అధినాయకత్వంతో దూరం పెంచినట్లు రాజకీయ ప్రచారం. ఆ తర్వాత ఆయన రాజకీయాలకు కొంత కాలంగా దూరంగా ఉన్నారు.

ఇక, గత ఎన్నికల ముందు టీడీపీ ఆహ్వానం మేరకు చంద్రబాబును కలిశారు. దీంతో మరోసారి ఎంపీగా అనకాపల్లి నుంచి పోటీ చేయడం ఖాయం అనే ప్రచారం జరిగినా అది సాధ్యపడలేదు. ఎన్నికలు సమీపిస్తున్న తరుణంలో ఇప్పుడు కొణతాల జనసేన నేతలతో టచ్‌లో ఉన్నట్లు తెలుస్తోంది. ఈ నేపథ్యంలో ఈసారి ఎన్నికల బరిలోకి దిగే ఛాన్స్ ఇస్తే పార్టీలో చేరే అవకాశాలు ఉన్నట్లు సమాచారం.