మెగా పవర్ స్టార్ రామ్ చరణ్(Ramcharan) ఉపాసన దంపతులు ఎంత అన్యోన్యంగా ఉంటారో అందరికీ తెలిసిందే. చరణ్ ఇంట్లోను, బయట కూడా భార్యకు ఎంతో సాయంగా వుంటారు. ఇంటి పనుల్లో ఓ చేయి వేయడం, బయట షాపింగ్‌కు వెళితే బ్యాగులు తను తీసుకురావడం ఇలా అన్నింట్లోనూ భార్య ఉపాసన(Upasana)కు చెర్రీ చేదోడువాదోడుగా ఉంటాడు.
తాజాగా చెర్రీ మరోసారి ది బెస్ట్ హస్బెండ్ అనిపించుకున్నాడు. అపర కుబేరుడు ముఖేశ్ అంబానీ(Mukhesh Ambani)ఇంట పెళ్లి వేడుకలు జరుగుతున్న విషయం తెలిసిందే. అంబానీ కొడుకు అనంత్ అంబానీ, రాధిక మర్చంట్‌ల ప్రీవెడ్డింగ్ గ్రాండ్‌గా జరుగుతోంది. ఈ వేడుకకు ఆహ్వానం అందడంతో రామ్ చరణ్, ఉపాసన దంపతులు శుక్రవారం జామ్ నగర్ బయలుదేరి వెళ్లారు.
అయితే, ఆ విమానంలో ఉపాసన కునుకు తీయగా రామ్ చరణ్ ఆమె పాదాలకు మసాజ్ చేశాడు. దీనికి సంబంధించిన వీడియో ప్రస్తుతం సోషల్ మీడియాలో వైరల్‌గా మారింది. చరణ్ అసిస్టెంట్ వీడియో తీసి సోషల్ మీడియాలో పోస్ట్ చేసినట్లు తెలుస్తోంది. ఈ వీడియో చూసిన మహిళలు రామ్ చరణ్‌ను తెగ మెచ్చుకుంటున్నారు.
ఆర్ఆర్ఆర్ సినిమాతో గ్లోబర్ స్టార్‌గా పేరు తెచ్చుకున్న చరణ్ ప్రస్తుతం శంకర్ డైరెక్షన్‌లో ‘గేమ్ ఛేంజర్’ సినిమా షూటింగ్‌లో బిజీగా ఉన్నాడు. రాజకీయ నేపథ్యంలో ఈ సినిమా రానున్నట్లు తెలుస్తోంది. సంచలన డైరెక్టర్ శంకర్ ఈ సినిమాలో చరణ్‌ను డిఫరెంట్ లుక్‌లో స్టైలిష్‌గా చూపిస్తున్నట్లు ప్రచార చిత్రాల ద్వారా తెలుస్తోంది. ఈ సినిమాను సెప్టెంబర్, 2024లో విడుదల చేయడానికి సన్నాహాలు చేస్తున్నారు.
