Telangana

తెలంగాణ అంటే కేసీఆర్.. ఆయన ఫ్యామిలీ.. ఇది గత చరిత్ర.. కేసీఆర్ అంటే ఇప్పుడు తెలంగాణ కాదని అంటున్నారు.. కుంటుంబపాలన గడీలు ముక్కలు చేసి కాంగ్రెస్ ను ప్రభుత్వంలో కూర్చోపెట్టిన రేవంత్ రెడ్డి అంటే కార్యకర్తల్లో ఉన్న అభిమానం అందరికి తెలిసిందే.. ఇప్పటికే రేవంత్ ఫాలోయింగ్ చూసిన బీఆర్ఎస్.. ప్రభుత్వాన్ని కూల్చడానికి వాడిన అస్త్రాలు తిరిగి ఆ పార్టీనే ముప్పతిప్పలు పెడుతున్నాయని అనుకొంటున్నారు.

ఇదే సమయంలో సిద్దిపేటలో మాజీ ఎమ్మెల్యే రఘునందన్ రావు హాట్ కామెంట్స్ చేశారు. కేసీఆర్ కుటుంబంలో మెదక్ (Medak) ఎంపీ సీటు (MP Seat) కోసం గొడవలు జరుగుతున్నాయని బాంబ్ పేల్చారు. ఆ సీటు కోసం పట్టుబడుతున్న కవితను.. హరీష్ రావు బ్లాక్ మెయిల్ చేస్తున్నారని ఆరోపించారు. ఆయన అనుమతితోనే బీఆర్ఎస్ ఎమ్మెల్యేలు సీఎం రేవంత్ రెడ్డిని కలిశారని పేర్కొన్నారు.

మెదక్ జిల్లా బీఆర్ఎస్ ఎమ్మెల్యేలు కాంగ్రెస్ లో చేరుతున్నారనే వార్త తెలుసుకొని.. వాళ్ళతో బలవంతంగా ప్రెస్ మీట్ పెట్టించారని రఘునందన్ రావు ఆరోపించారు.. సీట్లు అమ్ముకోవడం, డబ్బు దండుకోవడమనే ఆలోచనతో బీఆర్ఎస్ ఇప్పటి వరకు ముందుకు సాగిందని.. పార్లమెంట్‌ ఎన్నికల తర్వాత ఆ పార్టీ జీరో కాబోతోందని అన్నారు. ఇవాళ బలవంతంగా మీడియా ముందుకు వచ్చిన ఎమ్మెల్యేంతా బీఆర్‌ఎస్‌ను వీడడం ఖాయమన్నారు..

మరోవైపు గతంలో గులాబీ పార్టీ కాంగ్రెస్‌ నుంచి ఎమ్మెల్యేలను ఎలా లాక్కుందో.. ఇప్పుడు బీఆర్‌ఎస్‌ నుంచి కాంగ్రెస్‌ అలాగే గుంజుకుంటుంది అని రఘనందన్‌ జోస్యం పలికారు. అప్పటి హిస్టరీ ఇప్పుడు రిపీట్‌ అవుతుంటే బాధపడుతున్న నేతలకు అధికారంలో ఉన్నప్పుడు తెలియలేదా? అని ప్రశ్నించారు.. మీరు ముంచాలని భావించారు.. నిండా మునుగుతోన్నారని రఘునందన్ రావు (Raghunandan Rao) విమర్శించారు..

లోక్‌సభ ఎన్నికల తర్వాత తెలంగాణ (Telangana) రాజకీయ ముఖ చిత్రం పూర్తిగా మారనుందని విశ్లేషకులు భావిస్తున్నారు. ఇప్పటికే బీఆర్ఎస్ కు ఊహించని షాకిచ్చిన జోష్ లో ఉన్న కాంగ్రెస్ నేతలు.. కారును గ్యారేజీకి పరిమితం చేయాలనే ఆలోచనలతో వ్యూహాలు రచించడంలో వేగం పెంచారని అనుకొంటున్నారు. ఇందులో భాగంగా పీసీసీ నేతలు.. గ్రౌండ్‌ లెవల్లోనూ పార్టీ బలోపేతంపై దృష్టి పెట్టినట్లు టాక్ వినిపిస్తోంది.

అయితే ఇప్పటికే 10 మున్సిపాలిటీల్లో బీఆర్ఎస్‌ (BRS)కు షాక్‌ తగిలింది. మరో 18 మున్సిపాలిటీల్లోనూ అదే సీన్‌ రిపీట్‌ అయ్యే ఛాన్సుందని ప్రచారం జరుగుతోంది. అవిశ్వాస తీర్మానాలతో కార్పొరేటర్లు గులాబీకి ఆక్సిజన్ అందకుండా అడ్డుకొంటున్నారనే న్యూస్ ఇప్పటికే రౌండప్ చేస్తోంది. కారు సారు పదహారు అప్పుడు.. కారు సారు పంక్చర్ అనే ప్రస్తుత ట్రెండ్ దిశగా కాంగ్రెస్ (Congress) ముందుకు వెళ్తున్నట్టు ముచ్చటించుకొంటున్నారు.

మరోవైపు లోక్‌సభ ఎన్నికల్లో (Lok Sabha Elections)12 నుంచి 14 ఎంపీ స్థానాల్లో గెలుపే లక్ష్యంగా కాంగ్రెస్‌ పార్టీ పక్కా ప్లాన్‌తో అడుగులు వేస్తోందంటున్నారు.. ఈ క్రమంలో ఆరు గ్యారెంటీలను అస్త్రంగా భావిస్తోన్న హస్తం పార్టీ.. వాటి అమలు దిశగా వ్యూహాలు రచిస్తోందని తెలుస్తోంది. ఇప్పటికే ఆర్టీసీ బస్సులో ఉచిత ప్రయాణం, ఆరోగ్యశ్రీ పరిమితి 10 లక్షలకు పెంపు హామీలు అమల్లోకి వచ్చాయి. వచ్చే నెల నుంచి 200 యూనిట్ల ఉచిత విద్యుత్‌ను అమలు చేయాలని భావిస్తున్నట్లు టాక్..

అదీగాక బీఆర్ఎస్‌ లోకల్‌ లీడర్లు కాంగ్రెస్‌కు జై కొడుతూ.. సొంత పార్టీ నేతలపైనే అవిశ్వాస తీర్మానాలు ప్రవేశపెట్టడం.. పలు చోట్ల బీఆర్ఎస్‌ కౌన్సిలర్లు, జెడ్పీటీసీలు పార్టీకి రాజీనామా చేసి కాంగ్రెస్‌ గూటికి చేరుతున్న దృశ్యాలను చూస్తోన్న గులాబీ బాస్ లకు గుబులు మొదలైందని అంటున్నారు. కొండ నాలుకకు మందు వేస్తే ఉన్న నాలుక ఉడినట్లుగా బీఆర్ఎస్ పరిస్థితి మారుతోందనే ఊహాగానాలు మొదలైయ్యాయి.. కాంగ్రెస్ ను ఖాతం చేద్దామని భావిస్తే ఆ చక్రం తమ పని పట్టడంతో బీఆర్ఎస్ బీటలు వారడానికి సిద్దంగా ఉందని అనుకొంటున్నారు..

నిన్న సీఎం రేవంత్‌రెడ్డి (CM Revanth reddy) ఉమ్మడి మెదక్ (Medak) జిల్లాకు చెందిన నలుగురు ఎమ్మెల్యేలను కలిసినట్టు.. వారు బీఆర్ఎస్ వీడుతున్నట్లు గుప్పుమన్న వార్తలపై నర్సాపూర్ ఎమ్మెల్యే సునితాలక్ష్మారెడ్డి (MLA Sunithalaxamareddy) స్పందించారు. పార్టీ మారుతున్నట్లు వస్తున్న వార్తలను ఖండించారు.

మెదక్‌ జిల్లా సమస్యలు వివరించేందుకే సీఎం రేవంత్‌రెడ్డిని కలిశామని వివరణ ఇచ్చారు. తాము ఎవరితోనూ చర్చలు జరపడంలేదని, ప్రొటోకాల్, ఎస్కార్ట్ ఇవ్వడం లేదని ఫిర్యాదు చేశామన్నారు. కొందరు కావాలనే తప్పుడు ప్రచారం చేస్తున్నారని ఆగ్రహం వ్యక్తం చేశారు. బీఆర్‌ఎస్‌ (BRS) అధినేత కేసీఆర్‌ (KCR) నాయకత్వంలోనే చివరి వరకు పని చేస్తామని స్పష్టం చేశారు.

మరోవైపు స్పెషల్‌ డెవలప్‌మెంట్‌ ఫండ్స్‌ (SDF) ఇవ్వాలని ఉమ్మడి మెదక్‌ జిల్లాకు చెందిన నలుగురు బీఆర్‌ఎస్‌ ఎమ్మెల్యేలు మంగళవారం సీఎం రేవంత్‌రెడ్డిని కలిశారు. ఈ సందర్భంగా దుబ్బాక ఎమ్మెల్యే కొత్త ప్రభాకర్‌రెడ్డి మాట్లాడారు. ఎస్‌డీఎఫ్‌తో పాటు ప్రొటోకాల్‌ ఉల్లంఘన, గన్‌మెన్ల కుదింపు తదితర అంశాలను సీఎం దృష్టికి తీసికెళ్లినట్టు మీడియాకు వివరించారు.

ఈ క్రమంలో రాష్ట్ర రాజకీయాల్లో ఈ అంశం హాట్ టాపిక్ గా మారింది. దీంతో గులాబీ అధిష్టానం విషయాన్ని ఆరాతీయడం మొదలు పెట్టిందని సమాచారం. కాగా సీఎంను కలిసిన వారిలో పటాన్‌చెరు ఎమ్మెల్యే గుడెం మహిపాల్‌రెడ్డి, నర్సాపూర్‌ ఎమ్మెల్యే సునీతా లక్ష్మారెడ్డి, జహీరాబాద్‌ ఎమ్మెల్యే మాణిక్‌రావు, కొత్త ప్రభాకర్‌రెడ్డి ఉన్నారు. అయితే ఎమ్మెల్యేలు సీఎం ను కలవడంతో.. రాష్ట్రంలో బీఆర్ఎస్ పతనం ఆరంభం అయ్యిందా? అనే అనుమానాలు లేవనెత్తుతోన్నారు..

కేంద్ర ప్రభుత్వం గ్రామాలకు కేటాయించిన నిధులను గత బీఆర్‌ఎస్‌ (BRS) ప్రభుత్వం దారిమళ్లించిందని ఆరోపించిన ఎంపీ బండి సంజయ్‌ (Bandi Sanjay).. ముఖ్యమంత్రి రేవంత్‌రెడ్డి (Revanth Reddy)కి బహిరంగ లేఖ రాశారు. వెంటనే సర్పంచుల పెండింగ్ బిల్లుల విడుదలకు ఉత్తర్వులు ఇవ్వాలని లేఖలో కోరారు.

సర్పంచుల పెండింగ్ బిల్లులను అధికారంలోకి వచ్చిన వెంటనే చెల్లిస్తామని అసెంబ్లీ ఎన్నికల్లో హామీ ఇచ్చిన మీరు.. 50 రోజులు కావస్తున్నా పెండింగ్ బిల్లులపై దృష్టి సారించకపోవడం దురదృష్టకరం అని పేర్కొన్నారు. రాష్ట్ర ప్రభుత్వం తక్షణమే సర్పంచుల సంఘం ప్రతినిధులతో సమావేశం ఏర్పాటు చేయాలి అని బండి డిమాండ్ చేశారు.

అలాగే కాంగ్రెస్‌ పార్టీ ఎన్నికల మేనిఫెస్టోలో హామీ ఇచ్చిన ప్రకారం సర్పంచులతో సహా స్థానిక సంస్థల ప్రజా ప్రతినిధులకు గౌరవ వేతనం పెంచాలని కోరిన ఆయన.. మాజీ సర్పంచులు, ఇతర స్థానిక సంస్థల ప్రతినిధులకు పెన్షన్‌ మంజూరు చేయాలన్నారు. బీఆర్‌ఎస్‌ ప్రభుత్వం హయాంలో జరిగిన అవినీతి గురించి రాష్ట్రం మొత్తం మాట్లాడుకొంటుందని తెలిపిన బండి సంజయ్.. దేశంలో ఏ రాష్ట్రంలో లేని విధంగా పెండింగ్ బిల్లులు ఉన్నాయని.. వీటి కారణంగా సర్పంచులు ఆత్మహత్యలు చేసుకొన్న విషయాన్ని గుర్తు చేశారు.

గ్రామాభివృద్ధి కోసం చేసిన పనులను కూడా ప్రభుత్వ అధికారులు రికార్డు చేయకుండా సర్పంచులను ఇబ్బంది పెడుతున్నారని ఆరోపించారు. ఈ విషయాలపట్ల ప్రభుత్వం శ్రద్ధ వహించి వారికి న్యాయం జరిగేలా చూడాలని పేర్కొన్నారు..

తెలంగాణ (Telangana) రాజకీయాలు రోజు రోజుకు యూ టర్న్ తీసుకొంటున్నాయని అనుకొంటున్నారు. కేటీఆర్ (KTR) తరచుగా కాంగ్రెస్ (Congress)పై విమర్శలు చేస్తుండటం.. బీఆర్ఎస్ అధికారంలో వస్తుందని పదే పదే వల్లెవేయడం రాజకీయాల్లో ఆసక్తికరంగా మారింది. ప్రభుత్వం అన్నాక విజయాలు.. వైఫల్యాలు సర్వసాధారణమే.. అంత మాత్రానికే ప్రభుత్వాన్ని టార్గెట్ చేసి ఒకే పాట పాడటంపై కాంగ్రెస్ నేతలు మండిపడుతోన్నారు.

అయితే కాంగ్రెస్ ప్రభుత్వ మనుగడపై కేటీఆర్ వ్యాఖ్యలు.. పార్టీ నేతలతో అనిపిస్తున్న కామెంట్స్ కు రేవంత్ రెడ్డి (Revanth Reddy) ఘాటుగా స్పందించారు.. అసలు విషయం తెలుసుకొందామని రంగంలోకి దిగినట్టు సమాచారం.. విదేశీ పర్యట నుంచి రాగానే ఉమ్మడి మెదక్ జిల్లాకు చెందిన నలుగురు ఎమ్మెల్యేలను ఆయన కలిసినట్టు తెలుస్తోంది. అయితే కేటీఆర్ చేస్తున్న వాఖ్యలపై మాట్లాడిన వారు.. అలాంటి ఉద్దేశ్యం తమకు లేదని తెలిపినట్టు టాక్ వినిపిస్తోంది. ఇదే అంశంపై ఇంటలిజెన్స్ చీఫ్ శివనాథ్ రెడ్డితో సైతం మాట్లాడినట్టు సమాచారం.

మరోవైపు సీఎంగా బాధ్యతలు చేపట్టిన రేవంత్ రెడ్డి మొదటి రోజే ఇంటలిజెన్స్ చీఫ్ ను నియమించుకొన్నారు. తనకు ఉన్నది నలుగురు ఎమ్మెల్యేల మెజార్టీ అని ఆయనకు తెలుసు. ప్రభుత్వాన్ని కాపాడు కోవాలంటే ఏం చేయాలో సీఎం ముందుగానే వ్యూహాలు రచించిపెట్టుకొన్నట్టు ఇదివరకే ఆయన మాటల్లో సృష్టం చేశారు.. ఈ క్రమంలో కేటీఆర్.. రేవంత్ రెడ్డిని బెదిరించడానికో లేకపోతే తమ పార్టీ కార్యకర్తలకు భరోసా కల్పించడానికో కానీ.. పదే పదే కాంగ్రెస్ ప్రభుత్వం కూలిపోతుందనే ప్రకటనలు చేయడం వారికే ముప్పు అనే విషయాన్ని గ్రహించకపోవడంపై విమర్శలు వస్తున్నాయి.

ఇప్పటికే రాష్ట్రంలో బీఆర్ఎస్ పై నమ్మకం లేని ప్రజలు ఎన్నికల్లో దూరం పెట్టారనే ప్రచారం జరుగుతోంది. ఈ నేపథ్యంలో కేటీఆర్ మాటలు రాజకీయ విశ్లేషకులు సైతం నవ్వుకునేలా ఉన్నాయని అనుకొంటున్నారు.. ఇక పార్లమెంట్ ఎన్నికల ఫలితాల తర్వాత బీఆర్ఎస్ పరిస్థితిపై ఓ క్లారిటీ ఉంటుందనే వాదన వినిపిస్తుంది. ఆ నలుగురు మాత్రమే మిగులుతారా? అనే అనుమానాలు సైతం కొందరు వెల్లడిస్తున్నారు. ఇలాంటి సమయంలో పార్టీని కాపాడుకోవాలి కానీ నోరు జారీ ప్రభుత్వాన్ని విమర్శిస్తే లాభం ఏంటని కొందరు ప్రశ్నిస్తున్నారు..